გერმანიის პრეზიდენტმა ფრანკ-ვალტერ შტაინმაიერმა განაცხადა, რომ აშშ-ის პრეზიდენტ დონალდ ტრამპის მეორე ვადის დაწყება გერმანიის საგარეო ურთიერთობებში ისეთივე ღრმა რღვევას აღნიშნავს, როგორც რუსეთის მიერ უკრაინაში შეჭრა.

მან გერმანიის მიერ მეტი დამოუკიდებლობის მოპოვების მნიშვნელობას გაუსვა ხაზი. 

შტაინმაიერის თქმით, გერმანიამ რუსეთზე „ჭარბი დამოკიდებულებისგან“ თავის დაღწევით მიღებული გაკვეთილები შეერთებულ შტატებთან მიმართებით უნდა გამოიყენოს, განსაკუთრებით თავდაცვისა და ტექნოლოგიების სფეროში.

„ჩვენ ვიცით, რომ ეს ტექნოლოგიური ლიდერობა არა მხოლოდ საგარეო პოლიტიკურ ძალაუფლებას ნიშნავს, არამედ ჩვენს შიდა პოლიტიკაზე გავლენის მოხდენის ძალასაც ციფრული პლატფორმებისა და სოციალური მედიის საშუალებით“, - განაცხადა შტაინმაიერმა.

„ევროპას, როგორც ტექნოლოგიურ ცენტრს, აქვს ნიჭი, ბაზრები, შესაძლებლობები და, რაც მთავარია, ეთიკური სტანდარტები. ჩვენ ამაზე უნდა გავაგრძელოთ მუშაობა“, - დასძინა მან.