დღეს, 1-ელ სექტემბერს, თურქეთის პრეზიდენტმა რეჯეფ თაიფ ერდოღანმა ჩინეთში შანხაის თანამშრომლობის ორგანიზაციის სამიტის ფარგლებში მოლაპარაკებები გამართა თავის რუს კოლეგასთან ვლადიმერ პუტინთან. Reuters-ის ცნობით, მათ, კერძოდ, უკრაინაში ომის საკითხი განიხილეს.

გამოცემის ცნობით, ერდოღანმა პუტინს უთხრა, რომ ანკარა უკრაინაში ომის სამართლიანი და მდგრადი დასრულების პოვნაზე მუშაობს და რომ სტამბოლში მხარეებს შორის მოლაპარაკებები სამშვიდობო ძალისხმევას უწყობს ხელს.

გარდა ამისა, ერდოღანმა და პუტინმა განიხილეს ორმხრივი ურთიერთობები, აზერბაიჯანსა და სომხეთს შორის არსებული ვითარების სამშვიდობო ძალისხმევა, ისრაელის თავდასხმები ღაზაზე და სირიაში განვითარებული მოვლენები.

კრემლმა ასევე გაავრცელა რუსეთის ლიდერის განცხადება თურქეთის პრეზიდენტთან შეხვედრის შესახებ. როგორც განცხადებაშია აღნიშნული, პუტინმა გამოთქვა რწმენა, რომ „თურქეთის განსაკუთრებული როლი უკრაინაში ომის მოგვარებაში მომავალში მოთხოვნადი იქნება“.

„მადლიერები ვართ ჩვენი თურქი მეგობრების უკრაინის კრიზისის მოგვარების პოლიტიკასა და დიპლომატიურ ძალისხმევაში შეტანილი მნიშვნელოვანი წვლილისთვის. მიმდინარე წლის მაისიდან მოყოლებული სტამბოლში უკვე გაიმართა რუსეთ-უკრაინის პირდაპირი მოლაპარაკებების სამი რაუნდი, რამაც შესაძლებელი გახადა ჰუმანიტარული სფეროს რიგი პრაქტიკული საკითხების გადაჭრაში წინსვლა. დარწმუნებული ვარ, რომ თურქეთის განსაკუთრებული როლი ამ საკითხებში კვლავაც მოთხოვნადი იქნება“, - განაცხადა კრემლის მმართველმა.

მედიაში გავრცელებული ინფორმაციით, ერდოღანმა განაცხადა, რომ პუტინის თურქეთში ვიზიტს ელის.