აშშ-ის პრეზიდენტმა დონალდ ტრამპმა განაცხადა, რომ ამ კვირაში ვენესუელის დროებით პრეზიდენტს დელსი როდრიგესს ქვეყანაში არჩევნების ჩატარების შესახებ ესაუბრა.

„დიახ, არჩევნებზე ვესაუბრე“, - განუცხადა ტრამპმა ჟურნალისტებს თეთრ სახლში.

როდრიგესი აშშ-ის პრეზიდენტს 22 სექტემბერს ნიუ-იორკში, გაეროს გენერალური ასამბლეის ფარგლებში შეხვდა და ვენესუელასთან დიალოგის განახლების გამო ამერიკელი ლიდერი შეაქო. ეს იყო მისი პირველი ვიზიტი აშშ-ში მას შემდეგ, რაც იანვარში განხორციელებული რეიდის დროს ამერიკულმა ძალებმა ქვეყნის მაშინდელი პრეზიდენტი ნიკოლას მადურო დააკავეს.

აშშ-ის სახელმწიფო მდივანმა მარკო რუბიომ განაცხადა, რომ ტრამპმა და როდრიგესმა ვენესუელის მილიარდობით დოლარის ოდენობის სახელმწიფო ვალის რესტრუქტურიზაციის საკითხი განიხილეს. რუბიომ ასევე აღნიშნა, რომ ვაშინგტონი ქვეყანაში პოლიტიკური ცვლილებების განხორციელებას ითხოვს.

გაეროს გენერალურ ასამბლეაზე სიტყვით გამოსვლისას როდრიგესმა განაცხადა, რომ „სრულფასოვან დემოკრატიაზე“ გადასვლის პროცესის ფარგლებში ვენესუელაში არჩევნები ჩატარდება, თუმცა თარიღი არ დაუკონკრეტებია.