24 თებერვალს, უკრაინაში რუსეთის სრულმასშტაბიანი შეჭრის მეოთხე წლისთავზე, გაერთიანებულმა სამეფომ რუსეთის წინააღმდეგ 2022 წლის შემდეგ ყველაზე მასშტაბური სანქციების პაკეტის შემოღების შესახებ განაცხადა. შესაბამისი განცხადება დიდი ბრიტანეთის მთავრობის ვებსაიტზე გამოქვეყნდა.

აღსანიშნავია, რომ ლონდონმა გამოაცხადა თითქმის 300 ახალი სანქციის დაწესება, რომლებიც მიმართულია რუსეთის ენერგეტიკული შემოსავლების ძირითად წყაროებზე, მათ შორის ნავთობის ექსპორტსა და ომში გამოყენებული სამხედრო აღჭურვილობის ძირითად მიმწოდებლებზე.

კერძოდ, შეზღუდვების ქვეშ მოექცა მსოფლიოში ერთ-ერთ უდიდესი ნავთობსადენის კომპანია „ტრანსნეფტი“, რომელსაც რუსული ნავთობის ექსპორტის 80%-ზე მეტი გადააქვს.

დიდი ბრიტანეთის მთავრობის მონაცემებით, საერთაშორისო სანქციები ვლადიმერ პუტინს უკვე 450 მილიარდ დოლარზე მეტი დაუჯდა, რაც ომის კიდევ ორი ​​წლით დაფინანსებას უტოლდება. ამასობაში რუსეთის ნავთობიდან მიღებული შემოსავლები 2020 წლის შემდეგ ყველაზე დაბალ ნიშნულზეა და ქვეყნის ეკონომიკა სტაგნაციაშია.

ახალი შეზღუდვები ასევე ეხება გემებისა და კომპანიების ქსელს, რომლებიც რუსეთს სანქციებისგან თავის არიდებასა და ნავთობით ვაჭრობაში ეხმარებიან. „ჩრდილოვანი ფლოტის“ სანქციები ეხება 2Rivers-ის ნავთობის ქსელის 175 კომპანიას, ასევე რუსული ნავთობის გადამზიდავ 48 ტანკერს.

გარდა ამისა, სანქციების ქვეშ მოექცა:

✔️ 49 ორგანიზაცია და ფიზიკური პირი, რომლებიც მონაწილეობენ რუსეთის სამხედროების მხარდაჭერასა და იარაღისა და დრონების კომპონენტების მიწოდებაში, მათ შორის საერთაშორისო მომწოდებლები, რომლებიც უზრუნველყოფენ რუსული დრონებისა და სხვა იარაღისთვის სასიცოცხლოდ მნიშვნელოვან საქონელს, კომპონენტებსა და ტექნოლოგიებს;

✔️ სამოქალაქო ბირთვული ენერგიის სექტორში არსებული სამი კომპანია;

✔️ რუსეთის თხევადი ბუნებრივი აირის ინდუსტრიის ექვსი ობიექტი;

✔️ ცხრა რუსული ბანკი, რომლებიც ომის დაფინანსებისთვის მნიშვნელოვან საერთაშორისო გადახდებს ამუშავებენ.