CNN: შეერთებულმა შტატებმა სრულად განაახლა უკრაინისთვის იარაღის მიწოდება
შეერთებულმა შტატებმა საუდის არაბეთში დელეგაციის შეხვედრის შემდეგ განაახლა უკრაინისთვის იარაღის მიწოდება. ასევე, სრულად განახლდა სადაზვერვო ინფორმაციის გაცვლა კიევსა და ვაშინგტონს შორის, - ამის შესახებ CNN ამერიკელ ოფიციალურ პირზე დაყრდნობით იტყობინება.
ინფორმაციაში აღნიშნულია, რომ ჯო ბაიდენის ადმინისტრაციის მიერ დამტკიცებული დახმარების პაკეტების ფარგლებში, უკრაინას კვლავ მიეწოდება საარტილერიო ჭურვები, ტანკსაწინააღმდეგო იარაღი და საბრძოლო მასალა HIMARS-ის სარაკეტო სისტემისთვის.
„ეს მიწოდება შეჩერდა თეთრ სახლში პრეზიდენტ დონალდ ტრამპის, ვიცე-პრეზიდენტ ჯ.დ. ვენსის და უკრაინის პრეზიდენტ ვოლოდიმირ ზელენსკის შორის კატასტროფული შეხვედრის შემდეგ. ზოგიერთი იარაღი პოლონეთში იყო, სანამ უკრაინას მიეწოდებოდა“, - აცხადებენ ჟურნალისტები.
გარდა ამისა, CNN-ის წყაროს თქმით, ამერიკელმა კონტრაქტორებმა, რომლებიც დისლოცირებულნი არიან უკრაინაში, რათა დაეხმარონ ქვეყნის უფრო რთული იარაღის სისტემების მოვლა-პატრონობას, სწავლებასა და მხარდაჭერას, ასევე, განაახლეს მუშაობა. ჯერ კიდევ გაურკვეველია, გაემგზავრნენ თუ არა ისინი ქვეყნის ფარგლებს გარეთ უკრაინის დახმარების პაუზის დროს.
