შვედეთის პრემიერ-მინისტრი ულფ კრისტერსონი მიიჩნევს, რომ ევროპას, შეერთებულ შტატებთან ერთად, სანქციების საშუალებით რუსეთზე უფრო ეფექტური გავლენის მოხდენა შეეძლო, - ამის შესახებ მან მიუნხენის უსაფრთხოების კონფერენციაზე სიტყვით გამოსვლისას განაცხადა.

კრისტერსონის თქმით, რუსეთის ეკონომიკისთვის ზიანის მიყენება არსებითად რუსეთის შეკავების მიზნის მიღწევის კიდევ ერთი გზა იქნებოდა.

„მე მჯერა, რომ რუსეთის ეკონომიკა უკიდურესად დაუცველია. ჩვენ გვაქვს უამრავი მონაცემი, რომელიც აჩვენებს, რომ მათ ძალიან მძიმე დარტყმა მიაყენეს. ჩრდილოვანი ფლოტი სანქციების განხორციელების ერთ-ერთი გზაა. მაგრამ თუ ჩვენ ნამდვილად სერიოზულ სანქციებს დავუწესებდით, მაშინ აშშ-სა და ევროპის ერთობლივი, მასშტაბური სანქციები უზარმაზარ გავლენას მოახდენდა რუსეთზე და ჩვენ გარკვეულწილად თვალთმაქცები ვართ. ბევრად მეტის გაკეთება შეგვეძლო“, - აღნიშნა შვედეთის პრემიერ-მინისტრმა.

მისი თქმით, ევროპა რუსეთის შეკავების საკითხში თავდაცვით პოზიციას იკავებს, თუმცა შეტევითი თავდაცვითი ზომების მიღება სრულიად შესაძლებელია.