ჩინეთი მოუწოდებს ირანსა და აშშ-ს, შეინარჩუნონ რაციონალურობა, გამოიჩინონ თავშეკავება, დაუბრუნდნენ ისლამაბადის მემორანდუმს და „ჩაერთონ არსებით კონსულტაციებში“, - განუცხადა ჩინეთის საგარეო საქმეთა მინისტრმა ვანგ იმ პეკინში ვიზიტად მყოფ ირანელ კოლეგას აბას არაღჩის.

ჩინეთის საგარეო საქმეთა სამინისტროს ცნობით, ვანგმა მოუწოდა ყველა მხარეს, მიიღონ ქმედითი ზომები ჰორმუზის სრუტის უახლოეს პერიოდში გასახსნელად, რათა უზრუნველყონ საერთაშორისო ენერგეტიკული ტრანსპორტირებისა და მიწოდების ჯაჭვების სტაბილურობა. მან ასევე დასძინა, რომ ჩინეთს „არ სურს რეგიონული დაძაბულობის გავრცელება იემენსა და წითელ ზღვაზე“.

თეირანმა და ვაშინგტონმა „უნდა აღადგინონ მოლაპარაკებების მექანიზმი აქამდე მიღწეულ კონსენსუსზე დაყრდნობით“, - განუცხადა ვანგმა არაღჩის, რომელიც პეკინში ერთდღიანი ვიზიტით იმყოფება.

„არსებული ვითარება კიდევ ერთხელ ცხადყოფს, რომ ახლო აღმოსავლეთში უსაფრთხოების არსებული არქიტექტურა არაადეკვატურია და რეფორმირებასა და გაძლიერებას საჭიროებს“, - განაცხადა ვანგმა.

მან დასძინა, რომ ჩინეთი მზადაა, ხელი შეუწყოს მშვიდობას, სამართლიანობასა და კანონიერებას რეგიონში, ხოლო მისი პოლიტიკა ირანის მიმართ თანმიმდევრული და სტაბილური რჩება.