იერუსალიმის ძველ ქალაქში, დასავლეთის კედლის (ე.წ. გოდების კედლის) კომპლექსთან მდგომმა ისრაელის პრემიერ-მინისტრმა ბენიამინ ნეთანიაჰუმ განაცხადა, რომ ირანი გადაიარაღებას ცდილობს.

„პრეზიდენტმა ტრამპმა დღეს საღამოს განაცხადა, რომ ირანი ბირთვული იარაღით შეიარაღებას ცდილობს.ეს სიმართლეა. მას შემდეგ, რაც ჩვენ გავანადგურეთ მისი ბირთვული ბომბების წარმოების უშუალო შესაძლებლობა — როგორც ოპერაცია „აღმავალი ლომის“, ასევე ოპერაცია „მბრდღვინავი ლომის“ ფარგლებში, ის კვლავ ცდილობს“, - განაცხადა ნეთანიაჰუმ მისი ადმინისტრაციის მიერ გამოქვეყნებულ ვიდეოში.

მან პირობა დადო, რომ სანამ თანამდებობაზე იქნება, ირანი ბირთვულ იარაღს ვერ მიიღებს და რომ ირანისა და მისი მოკავშირეების წინააღმდეგ შემდგომ ზომებს მიიღებს.

„ჩვენ ირანის ღერძს ვუტევთ, მძიმე დარტყმებს ვაყენებთ არა მხოლოდ ღაზას სექტორში, არამედ ლიბანშიც. გავანადგურეთ ბოფორტის ქედი და ახლა ალი ტაჰერის ქედს ვუმკლავდებით. წინ კიდევ ბევრი რამაა“, - დასძინა მან.