ბელგიის თავდაცვის მინისტრმა თეო ფრანკენმა ევროპის ლიდერები, მათ შორის გერმანიის კანცლერი ფრიდრიხ მერცი, გააკრიტიკა იმის გამო, რომ ისინი ძალიან ბევრს საუბრობენ ბირთვულ იარაღზე. ამის შესახებ მან სოციალურ ქსელ X-ში დაწერა. 

„რაც შეეხება ბირთვულ შეკავებას, ნამდვილად არ მესმის, რატომ საუბრობენ ევროპელი ლიდერები ამდენს. ეს სისულელეა. გთხოვთ, ენას კბილი დააჭიროთ“, - დაწერა ფრანკენმა.

გერმანიის კანცლერმა ფრიდრიხ მერცმა Machtwechsel-ის პოდკასტში საუბრისას გამორიცხა გერმანიის მიერ საკუთარი ბირთვული არსენალის შექმნა. თუმცა მან აღნიშნა, რომ გერმანულ ავიაგამანადგურებლებს პოტენციურად შეუძლიათ ფრანგული და ბრიტანული ბირთვული იარაღის გადატანა.

გერმანია და ბელგია აშშ-ის ბირთვული იარაღის ერთობლივი გამოყენების შეთანხმების მხარეები არიან და მათ საჰაერო ძალებს შეუძლიათ აშშ-ის ბირთვული ბომბების ტარება.

მერცისა და ფრანკენის კომენტარები ევროპის ბირთვული შემაკავებელი ფაქტორის შესახებ დისკუსიის გამწვავების ფონზე გავრცელდა. 2 მარტს საფრანგეთის პრეზიდენტი ემანუელ მაკრონი ევროპის უსაფრთხოებაში საფრანგეთის ატომური იარაღის როლზე ისაუბრებს.

ბელგიის თავდაცვის მინისტრმა ასევე შეაფასა მერცის ნეგატიური კომენტარები გერმანიის, ესპანეთისა და საფრანგეთის მიერ შემუშავებულ Future Combat Air System-ის (FCAS) ავიაგამანადგურებელთან დაკავშირებით, როგორც პროგრამის სასიკვდილო განაჩენი. 

„ამ პოდკასტში, გერმანიის კანცლერის თქმით, FCAS-ი მკვდარია. ფრანგულ-გერმანული მეექვსე თაობის გამანადგურებელი აღარ იარსებებს. ბელგია ამ პროგრამაში დამკვირვებლის სტატუსით იყო. ჩვენ ჩვენს პოზიციას გადავხედავთ“, - დაწერა ფრანკენმა.

SCAF is dood aldus de Duitse bondskanselier @bundeskanzler in deze podcast. Er komt geen Frans-Duits zesde generatie jachtvliegtuig.

België was observator in het programma. We zullen onze positie herbepalen.

Ivm de nucleaire afschrikking begrijp ik echt niet waarom Europese…

— Theo Francken (@FranckenTheo) February 18, 2026