ავსტრიის საგარეო საქმეთა მინისტრი ბეატე მაინლ-რაისინგერი მიიჩნევს, რომ ჩინეთმა რუსეთზე ზეწოლა უნდა მოახდინოს, რათა მან უკრაინის წინააღმდეგ ომი დაასრულოს, თუ მას სურს დასავლეთის შემდგომი სანქციების თავიდან აცილება.

„პეკინი ვლადიმერ პუტინს „სამშვიდობო მოლაპარაკებებში“ ჩართვაში უნდა დაეხმაროს და კრემლის საომარი მანქანის მხარდაჭერა შეწყვიტოს.

ჩინეთს აკისრია პასუხისმგებლობა, გამოიყენოს თავისი გავლენა პუტინზე, რათა უზრუნველყოს, რომ ის გულწრფელად მიიღებს მონაწილეობას მოლაპარაკებებში. ევროკავშირის პოზიციაა პუტინზე ზეწოლა სანქციების მეშვეობით. თუ ეს სანქციები გვერდის ავლით მოხდება, ჩვენ უნდა მივიღოთ ზომები“, - აღნიშნა ავსტრიის დიპლომატიის ხელმძღვანელმა.

მაინლ-რაისინგერმა აღნიშნა, რომ ჩინეთი ავსტრიის ერთ-ერთი უმნიშვნელოვანესი სავაჭრო და საინვესტიციო პარტნიორია - გასულ წელს ჩინეთის ბაზარზე დაახლოებით 650 ავსტრიული კომპანია ოპერირებდა.

„ჩინეთი გლობალური ლიდერობის გზაზეა და ამას გარკვეული პასუხისმგებლობაც ახლავს თან. უკრაინა უკვე რამდენიმე თვეა მზადაა ცეცხლის შეწყვეტისა და ნებისმიერ დონეზე მოლაპარაკებებისთვის. თუმცა, პუტინი მზად არ არის. პეკინს კი მოსკოვზე გავლენა აქვს“, - დასძინა ოფიციალურმა პირმა.