ამერიკის შეერთებულ შტატებში ირანთან ომის საკითხზე სკეპტიკური დამოკიდებულება მატულობს. სოციოლოგიური კვლევების მიხედვით, გამოკითხულთა უმეტესობას მიაჩნია, რომ ამ ომის დაწყება შეცდომა იყო. ამის შესახებ The Washington Post იუწყება.

როგორც Washington Post /ABC News/Ipsos-ის ერთობლივმა კვლევამ აჩვენა, ირანის წინააღმდეგ სამხედრო ოპერაციას გამოკითხულთა 59%-მა შეცდომა უწოდა. ეს დაახლოებით შეესაბამება 2006 წელს ერაყში ამერიკის სამხედრო კამპანიის, და ვიეტნამში ომის მიმართ 1960-იან წლებში ამერიკელთა დამოკიდებულებას.

ყველაზე მეტად ირანის წინააღმდეგ ომს აშშ-ის „დემოკრატიული პარტიის“ მომხრეები ეწინააღმდეგებიან - 90%. ნეიტრალურ ამომრჩეველს შორის ომის წინააღმდეგია 71%, ხოლო „რესპუბლიკელების“ მომხრეებს შორის - ომს 19 პროცენტი ეწინააღმდეგება.

აშშ-ის მომავალ ნაბიჯებთან დაკავშირებით რესპონდენტთა პოზიცია გაიყო. 48%-ს მიაჩნია, რომ შეერთებულმა  შტატებმა ირანთან სამშვიდობო შეთანხმება უნდა გააფორმოს. 46% კი ამბობს, რომ ვაშინგტონმა თეირანზე ზეწოლა უნდა გააგრძელოს იმ შემთხვევაშიც კი, თუ ეს საბრძოლო მოქმედებების განახლებას გამოიწვევს.

ბენზინზე ფასის ზრდა ასევე მოქმედებს ამერიკელთა ჩვეულ ცხოვრებაზე. 44%-მა განაცხადა, რომ ავტომობილით გადაადგილება შეამცირა, ხოლო 42%-მა საცხოვრებლის შენახვის ხარჯები შეამცირა, 34%-მა მოგზაურობის გეგმები შეცვალა.