22 აგვისტოს შეერთებულმა შტატებმა დაახლოებით 20 მილიარდი დოლარის ღირებულების კანადურ საქონელზე 50%-იანი ტარიფები დააწესა, კანადამ კი განაცხადა, რომ სარკისებურ ზომებს მიმართავს. ამის შესახებ სააგენტო AP წერს.

აშშ-ის პრეზიდენტ დონალდ ტრამპის ახალი ტარიფები აშშ-ში კანადის წლიური ექსპორტის დაახლოებით 5%-ს მოიცავს. ტარიფებს დაექვემდებარება ისეთი პროდუქტებიც, როგორებიცაა ჰოკეის ჯოხები და სამედიცინო ჩხირები.

„კანადა ჩვენი მუშებისა და ბიზნესის დასაცავად სარკისებურ ტარიფებს დააწესებს“, - განაცხადა კანადის პრემიერ-მინისტრმა მარკ კარნიმ. მისივე თქმით, მთავრობა უახლოეს დღეებში კანადელი მუშებისა და ბიზნესებისთვის დამატებით მხარდაჭერას გამოაცხადებს.

ახალი ტარიფები მას შემდეგ დაწესდა, რაც ვაშინგტონსა და ოტავას შორის სავაჭრო შეთანხმებაზე მოლაპარაკებები წარუმატებლად დასრულდა. 

ტრამპის ადმინისტრაციის წარმომადგენლის თქმით, კანადა შეერთებული შტატებისგან ფოლადზე, ალუმინზე, ავტომობილებსა და ხე-ტყის მასალებზე დაწესებულ ტარიფებთან დაკავშირებით დათმობებს ითხოვდა, თუმცა ვაშინგტონმა ამაზე უარი თქვა.

აშშ-ის სავაჭრო წარმომადგენელმა ჯემისონ გირმა განაცხადა, რომ კანადამ უარი თქვა ამ კვირის დასაწყისში შეთანხმებული პირობებით გარიგების დადებაზე.

მისი თქმით, შეერთებულმა შტატებმა კანადას ამერიკულ ბაზარზე „ყველა მსხვილ ექსპორტიორს შორის საუკეთესო პირობები შესთავაზა, თუმცა ოტავას ახალმა მოთხოვნებმა და წინა ვალდებულებების ნაწილზე უარის თქმამ მიღწეული ბალანსი დაარღვია.

კარნიმ, თავის მხრივ, მოლაპარაკებების ჩაშლაში ვაშინგტონი დაადანაშაულა. მან განაცხადა, რომ აშშ-ის მიერ ბოლო წუთს შეთავაზებული ცვლილებები უსამართლო, ეკონომიკურად არახელსაყრელი იყო და ეჭვქვეშ აყენებდა ნებისმიერი მომავალი შეთანხმების სანდოობას.

კანადის პრემიერ-მინისტრმა გამოაცხადა, რომ მან მოლაპარაკებები შეაჩერა და კანადის დელეგაციას ოტავაში დაბრუნება დაავალა. ამჟამად ახალი მოლაპარაკებები დაგეგმილი არ არის.