აშშ-ის ცენტრალური სარდლობის ცნობით, აშშ-მა ირანის მიერ ჰორმუზის სრუტისა და სპარსეთის ყურის რეგიონის მიმართულებით გაშვებული ბალისტიკური რაკეტები და დრონები გაანეიტრალა. 

„ირანმა ქუვეითისა და ბაჰრეინის მიმართულებით შვიდი ბალისტიკური რაკეტა ისროლა მას შემდეგ, რაც აშშ-ის ცენტრალურმა სარდლობამ ჰორმუზის სრუტის მიმართულებით გაშვებული ოთხი ირანული ცალმხრივი მოიერიშე დრონი ჩამოაგდო“, - ნათქვამია ცენტრალური სარდლობის განცხადებაში.

პირველადი შეფასებებით, ირანის მიერ გაშვებული ექვსი რაკეტა ჩამოაგდეს, მეშვიდემ კი სამიზნეს ვერ მიაღწია. ამერიკელი პერსონალი არ დაშავებულა, ნათქვამია განცხადებაში.

„ირანის მტკიცება ბაჰრეინში აშშ-ის მე-5 ფლოტის შტაბ-ბინის დაზიანების შესახებ მცდარია“, - აღნიშნულია ცენტრალური სარდლობის განცხადებაში. ირანის ისლამური რევოლუციის გუშაგთა კორპუსმა მანამდე განაცხადა, რომ „რეგიონში მტრის ბაზებზე“ იერიში მიიტანა.

ცენტრალური სარდლობის ცნობით, ირანულმა მოიერიშე დრონებმა „რეგიონულ საზღვაო მიმოსვლას საფრთხე შეუქმნეს“. აშშ-ის ძალებმა გორუკსა და ქეშმის კუნძულზე ირანის სადაზვერვო რადარის ობიექტებს დაარტყეს „შემდგომი საზღვაო თავდასხმებისგან თავის დასაცავად“, ნათქვამია განცხადებაში.

https://t.co/otMGCOAWYY

— U.S. Central Command (@CENTCOM) June 6, 2026