აშშ-ის სახელმწიფო დეპარტამენტმა დიპლომატიური მისიის თანამშრომლებს საუდის არაბეთის დაუყოვნებლივ დატოვება მოსთხოვა. ამის შესახებ  The New York Times-ი ინფორმირებულ წყაროებზე დაყრდნობით წერს. 

როგორც მედიასაშუალება წერს, შეერთებული შტატების სახელმწიფო დეპარტამენტის ეს ნაბიჯი ნიშნავს, რომ ამერიკელი ოფიციალური პირები აცნობიერებენ რეგიონში მზარდ რისკებს.

ეს ბრძანება ეხება აშშ-ის საელჩოს ერ-რიადში, რომელიც ირანის მიერ რამდენჯერმე თავდასხმის სამიზნე გახდა. მოსახლეობას ურჩევენ, თავი აარიდონ საელჩოს ტერიტორიას. 

უსაფრთხოების განგაში გამოცხადდა ერ-რიადში, ჯიდასა და დაჰრანში ამერიკელებისთვის, სადაც აშშ-ის საკონსულოებია განთავსებული. 

აღსანიშნავია, რომ ეს ირანზე 28 თებერვალს დარტყმების დაწყების შემდეგ გამოცემული პირველი ასეთი ბრძანებაა. 

აშშ-ისა და ისრაელის მიერ ირანის წინააღმდეგ წამოწყებული სამხედრო ოპერაციის შემდეგ, საუდის არაბეთი არაერთხელ გახდა თეირანის საპასუხო იერიშების სამიზნე.