რუსები პოკროვსკის რაიონში სტრატეგიულ შეტევით ოპერაციას ატარებენ. მათ უზარმაზარი რაოდენობის ჯარი შეკრიბეს უპირატესობის შესაქმნელად და უკრაინის თავდაცვის ხაზის გასარღვევად, - ამის შესახებ უკრაინის შეიარაღებული ძალების მთავარსარდალმა ალექსანდრე სირსკიმ, გამოცემა „ნიუ-იორკ პოსტს“ განუცხადა.

მისი თქმით, კიევი „მტკიცედ იკავებს ლოჯისტიკურად მნიშვნელოვან ქალაქს“.

„ფრონტის ხაზზე სიტუაცია მართლაც დაძაბულია, მოწინააღმდეგე სტრატეგიულ შეტევით ოპერაციას ატარებს. მათ ძალების უმეტესი ნაწილი შეკრიბეს, რითაც უპირატესობა შექმნეს ჩვენი თავდაცვითი ხაზის გარღვევისა და ამ ტერიტორიის დაკავების მცდელობისას“, - განმარტა მთავარსარდალმა.

მან უარყო რუსი პროპაგანდისტების მტკიცება, რომ პოკროვსკი დაეცა და უკრაინული ძალები ალყაში მოაქციეს.

„განცხადება რომ  მოწინააღმდეგემ თითქმის ყველაფერი დაიპყრო - რეალობას არ შეესაბამება“, - განმარტა უკრაინის შეიარაღებული ძალების მთავარსარდალმა.

გავრცელებულ ინფორმაციაში აღნიშნულია, რომ უკრაინის ტერიტორიაზე განლაგებული დაახლოებით 700 000 სამხედრო მოსამსახურიდან მოსკოვმა პოკროვსკში დაახლოებით 150 000 გაგზავნა. შეტევაში, ასევე, ჩართულია ძლიერი მექანიზებული ჯგუფები და ოთხი საზღვაო ქვეითი ბრიგადა.

სირსკის თქმით, რუსეთის მიზანია პოკროვსკის და მეზობელი ქალაქების ჩრდილოეთიდან, სამხრეთიდან და აღმოსავლეთიდან ალყაში მოქცევა, მომარაგების ხაზების გადაჭრა და დარჩენილი მოსახლეობის იძულება, წავიდნენ, შემდეგ კი „საბოლოო მანევრის“ განხორციელება დონეცკის მთელი რეგიონის დასაკავებლად.

მან, ასევე, განაცხადა, რომ თავდაცვის ძალები ცდილობენ, ოკუპანტებს რაც შეიძლება მეტი დანაკარგი მიაყენონ.

მთავარსარდალმა მოუწოდა პარტნიორებს, უზრუნველყონ უკრაინა რაკეტებით, საჰაერო თავდაცვის სისტემებით და ელექტრონული საომარი მოქმედებებით, რათა მათ შეძლონ რუსული დრონებისა და სარაკეტო დარტყმების წინააღმდეგ ბრძოლა.