უკრაინის შეიარაღებული ძალების მთავარსარდალმა ალექსანდრ სირსკიმ, უარყო კრემლის მიერ უცხოელი აუდიტორიისთვის განკუთვნილი „დეზინფორმაცია“, უკრაინის სამხედრო ძალები აღმოსავლეთში სასტიკ ბრძოლებში გაცილებით უკეთეს შედეგებს აჩვენებს, ვიდრე რუსეთი ცდილობს წარმოაჩინოს.

როგორც Politico წერს, სირსკის ამ კვირაში გამართული ბრიფინგი მიზნად ისახავდა საინფორმაციო დღის წესრიგის შეცვლას აშშ-ის პრეზიდენტ დონალდ ტრამპის მხრიდან მკაცრი ზეწოლის ფონზე, რომელიც მოითხოვს კიევის დანებებას და სამშვიდობო გეგმაზე დათანხმებას, რომლის საწყისი ვლადიმერ პუტინთან ერთად იყო შემუშავებული

სირსკის თქმით, შეიძლება ჩანდეს, რომ უკრაინა „უბრალოდ უკან იხევს“ რუსული უწყვეტი თავდასხმების გამო, მაგრამ სინამდვილეში, უკრაინული ძალები თავდაცვის ხაზს ინარჩუნებენ და ბოლო დღეებში სადავო ქალაქებში ზოგიერთი პოზიციის დაბრუნებაც კი მოახერხეს.

მედიის ცნობით, სირსკი ჟურნალისტებს კიევში ესაუბრა იმ დროს, როდესაც რუსეთი ნელა აგრძელებს წინსვლას და თითოეული კილომეტრისთვის უზარმაზარ ფასს იხდის.

დეკემბრის დასაწყისში რუსეთის თავდაცვის სამინისტრომ განაცხადა, რომ მისმა საოკუპაციო ძალებმა, სავარაუდოდ, დაიკავეს ფრონტის ხაზზე მდებარე მნიშვნელოვანი ქალაქი პოკროვსკი, ასევე, ალყაში მოაქციეს უკრაინული ძალები მეზობელ მირნოგრადში და აიღეს ვოვჩანსკი და კუპიანსკი ხარკოვის რეგიონში.

უკრაინის შეიარაღებული ძალები ამტკიცებენ, რომ მათი ძალები პოკროვსკის გარკვეულ რაიონებში ხელახლა შევიდნენ. ისინი, ასევე, აცხადებენ, რომ რუსი სამხედრო მოსამსახურეების მცირე ჯგუფები მხოლოდ დროშებით დადგმული ფოტოების გადასაღებად იპარებიან, თუმცა მათ ქალაქის დანგრეულ ნანგრევებზე სრული კონტროლი არ აქვთ.

როგორც მედია წერს, ფრონტზე მცირე წინსვლის მიუხედავად, კრემლი ცდილობს დაარწმუნოს უკრაინის დასავლელი მოკავშირეები, რომ კიევის შემდგომი მხარდაჭერა უშედეგოა. 

ერთ-ერთ ბოლო ინტერვიუში ტრამპმა ხაზი გაუსვა, რომ მას სურს, რომ უკრაინის პრეზიდენტი ვოლოდიმირ ზელენსკი სწრაფად დათანხმდეს სამშვიდობო შეთანხმებას. 

სირსკიმ ხაზი გაუსვა, რომ რუსეთის რეალური წარმატებები გაცილებით მცირეა.

„რუსული ტყუილის მასშტაბები მრავალჯერ აღემატება ჯარების წინსვლის რეალურ ტემპს. მტერი უკრაინის წინააღმდეგ ჰიბრიდულ ომში იყენებს დეზინფორმაციას და ყალბ რუკებს, რაც გავლენას ახდენს როგორც უცხოელ აუდიტორიაზე, ასევე, ჩვენს საზოგადოებასა და არმიაზე“, - აღნიშნა მან.

თუმცა, სირსკიმ აღიარა, რომ პოკროვსკის რაიონში უკრაინელი დამცველებისთვის სიტუაცია კვლავ უკიდურესად რთულია - რუსეთმა ამ ტერიტორიაზე 156 000 ჯარისკაცი შეიყვანა.

სირსკიმ დაადასტურა, რომ უკრაინული ჯარები პოკროვსკიდან სრულად გავიდნენ შემოდგომაზე, თუმცა 15 ნოემბერს მათ კონტრშეტევა დაიწყეს და ქალაქის თითქმის ნახევარი დაიბრუნეს.

„ჩვენ კვლავ ვინარჩუნებთ ქალაქის ჩრდილოეთ ნაწილს - დაახლოებით რკინიგზის ხაზის გასწვრივ. გარდა ამისა, პოკროვსკის დასავლეთით ჩვენ ვაკონტროლებთ დაახლოებით 54 კვადრატულ კილომეტრს“, - დასძინა მან.

უკრაინის შეიარაღებული ძალების მთავარსარდლის თქმით, ნისლისა და წვიმის პირობებში სიტუაცია კვლავ ძალიან რთულია. ბოლოს და ბოლოს, მტერი ამინდს იყენებს ქალაქში შესაღწევად, რათა თავიდან აიცილოს უკრაინული უპილოტო საფრენი აპარატების დარტყმები. თუმცა, უკრაინა მხოლოდ აძლიერებს თავის დაჯგუფებას პოკროვსკში.