რუსეთის სიღრმეში ენერგეტიკულ ობიექტებზე უკრაინის მიერ განხორციელებულმა სამთვიანმა დრონებით თავდასხმებმა მნიშვნელოვანი ზიანი მიაყენა რუსეთს. მიუხედავად იმისა, რომ რუსეთმა გააუმჯობესა ჩაჭრის შესაძლებლობები, უკრაინული დანაყოფები მუშაობენ ახალ ტექნოლოგიებზე, რათა წინ წავიდნენ, - განუცხადა „როიტერსს “ მე-14 პოლკის, „ჩარლის“ სახელით ცნობილმა უფროსმა მეთაურმა.

როგორც მედია წერს, აგვისტოს დასაწყისიდან კიევმა რუსულ ენერგეტიკულ ობიექტებზე 60-ზე მეტი დარტყმა განახორციელა, რამაც ნავთობისა და ნავთობპროდუქტების მიწოდება მასშტაბური მილსადენების სისტემის მეშვეობით შეაფერხა.

„ჩვენი მოწინააღმდეგე გამოცდილია, ისინი სწრაფად ეგუებიან ჩვენს მეთოდებსა და ტაქტიკას“, - აღნიშნა „ჩარლიმ“.

მისი თქმით, ზოგიერთ უკრაინულ უპილოტო საფრენ აპარატს შეუძლია 2 000 კმ-მდე ფრენა, ფრონტის ხაზის მიღმა. ამავდროულად, რუსეთი აძლიერებს საჰაერო თავდაცვის შესაძლებლობებს, აღმოჩენის სისტემებს, რაც ართულებს შეტევების წარმატებას.

„მოწინააღმდეგე გარკვეულ ადგილებში გველოდება და ჩვენი წარმატების შესამცირებლად საპასუხო ზომებს იღებს“, - დასძინა მან.

მეთაურმა ხაზგასმით აღნიშნა, რომ უკრაინული მხარე დრონების რაოდენობაზე კი არა, მათ ხარისხზეა დამოკიდებული. პოლკს საკუთარი კვლევისა და განვითარების ჯგუფი ჰყავს, რომელიც აუმჯობესებს პლატფორმებსა და ტაქტიკას - ანალიზისა და ახალი ტექნოლოგიური გადაწყვეტილებების გამოყენებით რუსეთის თავდაცვის ხარვეზებს პოულობს.

მედიის ცნობით, ოპერაციების მასშტაბი კვლავ საკამათო საკითხად რჩება: პრეზიდენტმა ვოლოდიმირ ზელენსკიმ ისაუბრა შეტევისას 300-მდე დრონის გამოყენების შესახებ, ხოლო ერთ-ერთმა წყარომ „როიტერსს“ განუცხადა, რომ შემტევის მასშტაბი გაცილებით მცირეა.

კიევი მიიჩნევს, რომ რუსეთის ენერგეტიკულ სექტორზე დარტყმები მოწინააღმდეგის სამხედრო შესაძლებლობების შესუსტების ეფექტური გზაა. თუმცა, კრემლი ასეთ თავდასხმებს საშიშ ესკალაციას უწოდებს და აცხადებს, რომ გარე ზეწოლა უკან დახევას არ აიძულებს.

„დრონების დიდი რაოდენობა ყოველთვის არ წყვეტს პრობლემას - სწორედ ახალი მიდგომები და ტექნოლოგიები გვაძლევს წარმატებას“, - დასძინა „ჩარლიმ“.