აშშ-ის სპეციალური წარმომადგენლის კით კელოგის განცხადებით, პრეზიდენტ დონალდ ტრამპის ადმინისტრაცია ცდილობს, დაასრულოს მკვლელობები და შეაჩეროს რუსეთის ომი უკრაინის წინააღმდეგ. ამავდროულად, ტრამპის ადმინისტრაცია აღიარებს, რომ ომის დასრულება უფრო რთული ამოცანაა, ვიდრე მისი დაწყება და ბრძოლა.

კელოგმა აღნიშნა, რომ დიპლომატიურ ფრონტზე ინტენსიური მუშაობა მიმდინარეობს, რომლის ფარგლებშიც აშშ-ის პრეზიდენტი დონალდ ტრამპი ალასკაში ვლადიმერ პუტინს, ხოლო ვაშინგტონში უკრაინის პრეზიდენტ ვოლოდიმირ ზელენსკის და ევროპელ ლიდერებს შეხვდა.

როგორც კელოგმა განაცხადა, ომის დასრულება „ადვილი საქმე არ არის“, თუმცა აშშ-ის ლიდერი დონალდ ტრამპი „მშვიდობის პრეზიდენტია“ და უკრაინაში მკვლელობებისა და ნგრევის დასრულებისკენ ისწრაფვის.

„თქვენ ხედავთ სამშვიდობო პროცესს, რომელზეც ჩვენ ვმუშაობთ. ჩვენ ძალიან ბევრს ვმუშაობთ. ვიმედოვნებთ, რომ მოკლევადიან პერსპექტივაში მივაღწევთ ისეთ პოზიციას, სადაც გვექნება უკეთესი, გრძელვადიანი უსაფრთხოების გარანტიები“, - აცხადებს აშშ-ის სპეციალური წარმომადგენელი. 

კელოგი აღიარებს, რომ ეს ომი მეორე მსოფლიო ომის შემდეგ ყველაზე მასშტაბურია. თუმცა, ის აღნიშნავს, რომ უკრაინასა და რუსეთში მსხვერპლის დონე ახლა უფრო მაღალია, ვიდრე მაშინ იყო. ამ მიზეზით, მისი თქმით, ყველას, ვინც ჯარში მსახურობდა და ომის შედეგად გამოწვეული ნგრევა იხილა, მისი დასრულება სურს. და სწორედ ამას უჭერს მხარს ტრამპი.

ამასთან დაკავშირებით, აშშ-ის სპეციალური წარმომადგენელი იმედოვნებს, რომ ერთ წელიწადში, 2026 წელს, დამოუკიდებლობის დღეს, უკრაინა მსოფლიოში სხვა ქვეყანა იქნება.

„ეს რთული, ძალიან რთული ამოცანაა. პრეზიდენტი ტრამპი ამას აღიარებს. მეც ვაღიარებ. ყველანი ვაღიარებთ ამას. არ მსიამოვნებს ამის თქმა: ომის წარმოება ადვილია, მაგრამ მშვიდობის მიღწევა რთულია. ომის დაწყება ადვილია, მაგრამ ომის შეჩერება ნამდვილად ძალიან რთულია და სწორედ აქ ვართ ახლა“, - დასძინა კელოგმა.