კიევსა და კრივოი-როგზე განხორციელებული სარაკეტო შეტევების შედეგად, ჯამში 20 ადამიანია დაღუპული. ამის შესახებ ინფორმაციას უკრაინული მხარე ავრცელებს. 

კიევის საქალაქო სამხედრო ადმინისტრაციის ინფორმაციით, დედაქალაქში რუსული მასირებული შეტევის შედეგად დაღუპულთა რაოდენობა 10-მდე გაიზარდა, ხოლო დაშავებულია მინიმუმ 35 მოქალაქე, მათ შორის, ერთი ბავშვი. 

ადგილობრივი მედიის ცნობით, შეტევას სამოქალაქო ინფრასტრუქტურის ნგრევა მოჰყვა კიევის 7 რაიონში.

კიევის მერის, ვიტალი კლიჩკოს განცხადებით, შეტევის შედეგად დაზიანდა ბავშვთა სამედიცინო დაწესებულების ერთ-ერთი შენობა.

ამასთან, კრივოი-როგის მერის, ალექსანდრ ვილკულის ცნობით, ქალაქში ნგრევას 10 ადამიანი ემსხვერპლა, დაშავებულთა რაოდენობა კი 41-ს აღწევს.

„დაღუპულთა შორის 6 ქალია და ოთხი კაცი. დაშავებულთა შორის 9, მძიმე მდგომარეობაშია“, - წერს კრივოი-როგის მერი.

ადგილზე სამაშველო სამსახურები ამ დრომდე მუშაობენ.