„პატივცემულო დელეგატებო, მოგესალმებით საქართველოს ახალგაზრდების სახელით. ჩვენს ენაში სიტყვა- ახალგაზრდა შედგება ორი ფუძისგან: ახალი და ზრდა. დღეს საქართველოში ვცდილობთ, შევქმნათ ისეთი პირობები, სადაც ეს ზრდა შემთხვევითობაზე არ იქნება მინდობილი, არამედ საერთო პასუხისმგებლობითა და კეთილდღეობის მკაფიო ხედვით იქნება წარმართული“, - განაცხადა ანამარია ქუთათელაძემ გაეროს ეკონომიკური და სოციალური საბჭოს ახალგაზრდულ ფორუმზე სიტყვით გამოსვლისას.

ქუთათელაძე ამბობს, რომ ახალგაზრდებს, განსაკუთრებით კი, მიგრაციითა და იძულებით გადაადგილებით დაზარალებულებს, უნდა ჰქონდეთ საკუთარი ხმა ქვეყნის განვითარებაში. იგი მის პირად გამოცდილებასაც აზიარებს და ამბობს, რომ ის მათ შორის, წარმოადგენს იმ თაობასაც, რომლებიც სხვადასხვა მიზეზით უცხოეთში გაიფანტნენ.

გამომსვლელი ხაზს უსვამს, რომ საქართველო უახლოვდება საერთაშორისო მიდგომებს, სადაც ახალგაზრდების განათლება და კეთილდღეობა მნიშვნელოვანია, თუმცა საკმარისი არ არის და საჭიროა რეალურ გამოცდილებაზე დაფუძნებული მიდგომა.

„მე ვსაუბრობ არა მხოლოდ ახალგაზრდების სახელით, არამედ იმ თაობების სახელითაც, რომლებიც მიგრაციამ და იძულებითმა გადაადგილებამ გაფანტა. მეც მცირე ასაკში დავტოვე საქართველო და ვარ იძულებით გადაადგილებული დედის შვილი. ეს გზა აყალიბებს ჩვენს იდენტობასა და კუთვნილების განცდას. ხანგრძლივი დროის განმავლობაში აძლიერებს ჩვენს ერთგულებას საქართველოს მიმართ, რათა დავაბრუნოთ ცოდნა, გამოცდილება და ავაშენოთ მომავალი, სადაც ახალგაზრდებს საკუთარ ქვეყანაში განვითარების შესაძლებლობა ექნებათ. საქართველოს ახალგაზრდული პოლიტიკა რთულ გარემოში ვითარდება, რომელსაც ახასიათებს დემოკრატიული გარდაქმნები, ოკუპაცია, სოციალური და ეკონომიკური გამოწვევები და ციფრული ჩართულობის აუცილებლობა. საქართველოს სახელმწიფო ახალგაზრდული სტრატეგია სულ უფრო მეტად ემთხვევა საერთაშორისო მიდგომებს, რომლებიც ახალგაზრდების კეთილდღეობას განიხილავენ, როგორც მდგრადი განვითარების ერთ-ერთ მთავარ საფუძველს.

საქართველო ასევე ერთვება საერთაშორისო დისკუსიებში განათლების სფეროში კეთილდღეობის საკითხებზე. ამ მიმართულების ვაღრმავებთ ჩვენს გაგებას, ახალგაზრდებზე დაფუძნებული პოლიტიკის ჩარჩოს მხარდაჭერით და მზად ვართ, რომ ჩვენი ხედვები და მოსაზრებები მსოფლიოს გავუზიაროთ. თუმცა, მისი პოტენციალის სრულად რეალიზებისთვის, ეს გაგება კიდევ უფრო ჰოლისტური უნდა გახდეს- დაფუძნებული აკადემიურ კვლევებზე და ახალგაზრდების ხმით ჩამოყალიბებული. არსებულ პროგრამებზე დაყრდნობით, ჩვენ გავაგრძელებთ ახალგაზრდების მრავალფეროვანი და მუდმივად ცვალებადი საჭიროებების კომპლექსურად დაკმაყოფილებას.

ახალგაზრდებიც თავად პასუხობენ ამ გამოწვევებს. ისინი ისეთ ინიციატივებს ქმნიან, რომლებიც კეთილდღეობას უწყობს ხელს. ეს ძირეული ძალისხმევა იზოლირებული არ არის, არამედ ახალგაზრდული გამძლეობის ფართო სისტემის ნაწილია. ძალისხმევა თვალსაჩინოა, პროგრესი აშკარაა, მაგრამ ეს საკმარისი ჯერ კიდევ არ არის. მეტის გაკეთება არის შესაძლებელი და უკვე კეთდება კიდეც. ჩვენი ახალი ზრდის მხარდაჭერა ნიშნავს იმას, რომ მდგრადი განვითარება მხოლოდ მიზანი კი აღარ იყოს, არამედ გახდეს ყოველდღიურად განცდილი ცხოვრების ნაწილი, რომელსაც ადამიანები რეალურად გრძნობენ“ - განაცხადა ანამარია ქუთათელაძემ.