ლისაბონის „სპორტინგმა“ გიორგი ქოჩორაშვილი წარადგინა.

ქოჩორაშვილმა „სპორტინგთან“ კონტრაქტი 2030 წლის ზაფხულამდე გააფორმა და მისი გამოსასყიდი პუნქტის ფასი 80 მილიონი ევროთი განისაზღვრა.

ქართველმა ფეხბურთელმა წარდგენის შემდეგ კომენტარიც გააკეთა და გოლის აღნიშვნის სტილზე ისაუბრა.

„კაპიტანი ამერიკის ისტორიაში ამბობდნენ, რომ ის სუსტი იყო, რომ მზად არ იყო. შემდეგ, გარდაქმნეს და მან სამყარო გადაარჩინა, ხალხს დაეხმარა. როდესაც ასე აღვნიშნავ, ეს იმ ბავშვებისთვისაა, რომლებსაც ეუბნებიან, რომ ისინი გამოწვევებისთვის მზად არ არიან. მათ ვეუბნები, რომ თუ მე შევძელი და თუ კაპიტანმა ამერიკამ შეძლო, თქვენც შეგიძლიათ ამის გაკეთება. თქვენ უნდა გჯეროდეთ, იშრომოთ და გქონდეთ დისციპლინა“, - განაცხადა ქოჩორაშვილმა. 

ქოჩორაშვილი „სპორტინგის“ რიგებში ჩემპიონთა ლიგაზე ითამაშებს, კარიერაში პირველად: „როდესაც პატარა ვიყავი, ვოცნებობდი, რომ ერთ დღეს ამის გაკეთება შემეძლებოდა. ხშირად არ მაძლევდნენ ჩემპიონთა ლიგის თამაშების ყურების უფლებას, რადგან უკვე ძალიან გვიანი იყო და ძილი მჭირდებოდა, მაგრამ ახლა ოცნებას ავისრულებ. უბრალოდ მინდა გუნდის დახმარება, რადგან გუნდური შრომა ყველაზე მნიშვნელოვანია. ვიცი, რომ შემიძლია წვლილი შევიტანო მოედანზეც და მის გარეთაც“.

გიორგი პორტუგალიურ გუნდში კარგად მიიღეს: „ყველამ ძალიან კარგად მიმიღო, თითქოს ძმა ან შვილი ვყოფილიყავი. როდესაც ახალ სახლში შედიხარ, თავს სხვანაირად გრძნობ, მაგრამ ერთ-ორ დღეში მათ თავი მათნაირად მაგრძნობინეს. რა თქმა უნდა, სირთულეები გვექნება, მაგრამ ვიცი, რომ თუ ერთად ვიქნებით, შეგვიძლია გავაგრძელოთ ის, რაც აქამდე გაკეთდა. ვიმუშავებ იმისთვის, რომ ვაჩვენო, რომ ამ მაისურის ტარების ღირსი ვარ, რაც ყველაზე მნიშვნელოვანია ლოგოსთან ერთად“.

ქოჩორაშვილმა თავის სათამაშო სტილზეც ისაუბრა: „ყველას გვიყვარს გოლების გატანა, მაგრამ ყველაზე მნიშვნელოვანი ის არის, რომ დავეხმარო ჩემს თანაგუნდელებს, სადაც ეს სჭირდებათ. თუ მცველს ან ვინგერს დავჭირდები, მე იქ ვიქნები. მინდა ვიყო მოთამაშე, რომელიც თანაგუნდელებს ღირებულებას შემატებს. სიტყვები, რომლებიც ყველაზე მეტად მომწონს, არის შეუპოვრობა და გამძლეობა. სირთულეები გვექნება, მაგრამ მე ყოველდღე ვიმუშავებ მათ დასაძლევად“.

და ბოლოს, გიორგი ქოჩორაშვილმა „სპორტინგის“ გულშემატკივრებს მიმართა: „ისიამოვნეთ. ჩვენს ცხოვრებაში ყველაზე მნიშვნელოვანი ის არის, რომ ვისიამოვნოთ იმით, რასაც ვაკეთებთ. მოდი, ჩვენი წვლილი შევიტანოთ და მჯერა, რომ ეს ძალიან ლამაზი სეზონი იქნება“.

შეგახსენებთ, გიორგი ქოჩორაშვილი პორტუგალიის ჩემპიონ „სპორტინგს“ ესპანური „ლევანტედან“ შეუერთდა.