ნიკა კვეკვესკირმა საფეხბურთო კარიერა დაასრულა, - ამის შესახებ მან პრესკონფერენციაზე გამოაცხადა.

ის ამიერიდან საქართველოს ნაკრებში, ვილი სანიოლის სამწვრთნელო შტაბში იმუშავებს.

„აქ იმიტომ ვარ, რომ ყველას ვაცნობო, რომ საფეხბურთო კარიერა დავასრულე და მინდოდა, ეს ყველაფერი ჩემგან გაჟღერებულიყო. ცოტა მიჭირს საუბარი, ცოტა ვნერვიულობ, განსაკუთრებული მომენტია, მაგრამ პირველ რიგში მადლობა ჩემს თანაგუნდელებს, ყველა მწვრთნელს, ფეხბურთის ფედერაციას, თითოეულ თანამშრომელს.

ჩემთვის ძალიან დიდი პატივი იყო მეტარებინა საქართველოს ნაკრების მაისური და რა თქმა უნდა, საოცნებო ევროპის ჩემპიონატზე მონაწილეობა მიმეღო. რთული გადაწყვეტილება იყო ეს ყველაფერი, მაგრამ დგება დრო გადაწყვეტილების მისაღებად და ცხოვრებაში ახალი ფურცელი უნდა გადაშალო.

მინდა, ასევე, მადლობა გადაგიხადოთ ჟურნალისტებს პატივისცემისთვის, ამ წარმატების მიზეზი თქვენც ხართ და დარწმუნებული ვარ, ეროვნულ ნაკრებს კიდევ უფრო დიდი წარმატება ელოდება“, - განაცხადა ნიკა კვეკვესკირმა.

ნიკა კვეკვესკირმა საქართველოს ნაკრებში 62 მატჩი ჩაატარა და ევროპის ჩემპიონატზე ითამაშა. მან საბერძნეთის წინააღმდეგ ისტორიულ შეხვედრაში ბოლო და გადამწყვეტი პენალტი შეასრულა.

33 წლის ფეხბურთელს საკლუბო კარიერაში „ბაიაში“, „დინამო თბილისში“, „ცხინვალში“, „დილაში“, ბაქოს „ინტერში“, „გაბალაში“, „ტობოლში“, „ლეხსა“ და „ნიიერეგიჰაჟაში“ უთამაშია.

ნიკა კვეკვესკირმა განაცხადა, რომ ის არაფერს დაიშურებს, რომ ნაკრებს მწვრთნელის რანგშიც გამოადგეს:

„მინდა მადლობა ვუთხრა ფედერაციას, რადგან ძალიან დიდ საქმეს აკეთებს მწვრთნელთა განათლების პროგრამით, რომლის გარეშე აქ არ ვიქნებოდით. ამის გარეშე შეუძლებელი იქნებოდა, რომ ასე სწრაფად მწვრთნელად დამეწყო მუშაობა. მოქმედი ფეხბურთელებისთვის ეს ძალიან მნიშვნელოვანია, რომ სწრაფად და დაბრკოლების გარეშე გადავიდნენ ახალ ეტაპზე. ძალიან დიდი მადლობა ვილის და იაშვილს ნდობისთვის. ძალიან დიდი პრივილეგიაა იყო საქართველოს ნაკრების ერთ-ერთი მწვრთნელი. ეს არის ადგილი, რომელიც ყველაზე ძალიან მიყვარს, ყველაზე ბედნიერი ვარ და არაფერს დავიშურებ, რომ ეს ნდობა გავამართლო“.

ნიკამ აღნიშნა, რომ თავის დონეზე ვეღარ თამაშობდა, ისე, როგორც სურდა, ამიტომაც, გადაწყვიტა კარიერის დასრულება.

„ფეხბურთი ჩემთვის პირველ რიგში სიყვარულთან, ვნებასთან და სიამოვნებასთან ასოცირდებოდა, რადგან ეს საქმე ყველაზე დიდ სიამოვნებას მანიჭებდა. როდესაც ვერ აკეთებ საქმეს იმ დონეზე, როგორც გინდა, უნდა მიიღო კონკრეტული გადაწყვეტილება. ვერ ვიტყვი, რომ კარიერის გაგრძელება ფიზიკურად არ შემეძლო, მაგრამ მგონია, რომ ეს იქნება სწორი ნაბიჯი, რადგან არანაკლები ინტერესი ვნება გამაჩნია ამ საქმისადმი. ეროვნულ ნაკრებთან ერთად ისეთ რამეს მივაღწიეთ, რომ კმაყოფილი და ბედნიერი მივდივარ“, - დასძინა მან.