„პარი სენ-ჟერმენის“ მთავარმა მწვრთნელმა ლუის ენრიკემ ლიგა 1-ის 27-ე ტურში „სენტ ეტიენთან“ მატჩის წინ პრესკონფერენცია გამართა.

სხვა თემებთან ერთად, ესპანელმა ხვიჩა კვარაცხელიაზეც კიდევ ერთხელ ისაუბრა. უფრო კონკრეტულად, უპასუხა შეკითხვას, გაკვირვებულია თუ არა, ქართველი ფეხბურთელით.

„ტექნიკურად გასაკვირი არაფერია, ჩვენ მას უკვე ვიცნობდით. ის ძალიან ცნობადია მსოფლიო ფეხბურთის სცენაზე. რამაც გამაოცა, იყო მისი უნარი, რომ მოერგოს გუნდის დაცვით მუშაობას. ის პირველია, ვინც პრესინგს აკეთებს, როცა ბურთი არ გვაქვს. დანარჩენი ვიცოდით, რადგან ვიცნობდით.

ფეხბურთელები თავს ძალიან კარგად გრძნობენ. გუნდში დაბრუნების პროცესმა კარგად ჩაიარა და ვფიქრობ, დროა, რომ ჩემპიონატზე ორიენტირებული ვიყო. სანაკრებო პაუზიდან დაბრუნება ყოველთვის განსაკუთრებულია, ვცდილობთ, პროგრამა ყველას მოთხოვნილებებზე მოვარგოთ. ვინც პარიზში დარჩა, კონკრეტული პროგრამა ჰქონდა, ნაკრებში წასულებმა კი ენერგია უნდა აღიდგინონ.

ეს იქნება ოდნავ განსხვავებული მატჩი, ვიდრე პირველი შეხვედრა სახლში. „სენტ ეტიენი“ ისტორიული კლუბია, შესანიშნავი სტადიონითა და გულშემატკივრებით, ეს არის გამოწვევა, რომელსაც მოუთმენლად ველით. იმედი მაქვს, კარგ შოუს ვიხილავთ, მომეწონა ეს გუნდი, როდესაც მათ „პარკ დე პრენსზე“ დავუპირისპირდით.

ჩემპიონები მანამდე არ ვართ, სანამ მას არ გავიფორმებთ. ჩვენ უნდა გამოვიყენოთ ის ფაქტი, რომ ალბათ გავხდებით ჩემპიონები, რომ დავრჩეთ ძალიან მაღალ დონეზე და ფოკუსირება მოახდინოთ უფრო გლობალურ ან უფრო კონკრეტულ მიზნებზე. ჯერ კიდევ ბევრი ქულაა გასათამაშებელი და ჩვენი მიზანია ბოლომდე საუკეთესო შედეგი ვაჩვენოთ“, - განაცხადა ლუის ენრიკემ.

შეგახსენებთ, ხვიჩა კვარაცხელიამ პსჟ-ს რიგებში დღემდე 14 მატჩი ჩაატარა, რომელშიც 2 გოლით, 3 საგოლე პასით და 1 მოპოვებული პენალტით გამოირჩა. პსჟ ლიგა 1-ს სეზონის დასრულებამდე 8 ტურით ადრე 19-ქულიანი უპირატესობით ლიდერობს, ხოლო „სენტ ეტიენს“ 29 მარტს, თბილისის დროით 22:00 საათზე დაუპირისპირდება. ასე რომ, კვარაცხელია ზურიკო დავითაშვილის წინააღმდეგ ითამაშებს.