ფეხბურთის ფედერაციის პრეზიდენტის, ლევან კობიაშვილის განცხადებით, ვილი სანიოლი შემოდგომაზე, ერთა ლიგის მატჩებში საქართველოს ნაკრებს კვლავ უხელმძღვანელებს. 

მისივე თქმით, ორივე მხარის სურვილია, რომ თანამშრომლობა მომავალშიც გაგრძელდეს, თუმცა, ამ საკითხზე მოლაპარაკებები წინაა.

„ვილი სანიოლთან სამომავლო გეგმებზე ევროპის ჩემპიონატის დაწყებამდეც ვისაუბრეთ. ჩვენი სურვილია, რომ ის დარჩეს საქართველოს ნაკრებში. მისი პოზიციაც ვიცით. ის თავს კომფორტულად გრძნობს საქართველოში და სამომავლო გეგმები აქვს ჩვენთან ერთად. თუმცა, ჯერ ეს სურვილებია და უახლოეს მომავალში, ყველაფერს დეტალურად გავივლით. ბევრი რაღაც არის, პირობები და ასე შემდეგ. ლოგიკურია, რომ სურვილები, ინტერესები და მოთხოვნები სხვა გვაქვს. მათ შორის ვილისაც, არც არის გასაკვირი, რომ სხვა პირობები ჰქონდეს და ეს ნორმალურიც არის და მისაღებია. თუმცა, ორივე მხარეს გვინდა, რომ რაც შეიძლება დიდი ხანი ვიყოთ ერთად“, - განაცხადა ლევან კობიაშვილმა გადაცემაში „სპორტი იმედზე“.

შეგახსენებთ, ვილი სანიოლი საქართველოს ნაკრებში 2021 წლის დასაწყისიდან მუშაობს და კონტრაქტი წლის ბოლოს ეწურება.

აღსანიშნავია, რომ სწორედ სანიოლის მწვრთნელობის ქვეშ ითამაშა ჩვენმა ნაკრებმა ისტორიაში პირველად ევროპის ჩემპიონატზე, სადაც მერვედფინალურ ეტაპში გავიდა.