ფინანსთა სამინისტროს შემოსავლების სამსახურის ხელმძღვანელი, ირაკლი (დაჩი) ბერაია „ლაგოდეხის“ საბაჟო გამშვებ პუნქტზე იმყოფებოდა, სადაც საბაჟო დეპარტამენტის უფროსთან, მიხეილ ჩოკოშვილთან ერთად, აღნიშნული გამშვები პუნქტი დაათვალიერა და გაზრდილი ტვირთბრუნვის პირობებში საზღვრის კვეთის პროცედურებს ადგილზე გაეცნო. აღნიშნულზე ინფორმაციას შემოსავლების სამსახური ავრცელებს. 

მათივე ცნობით, ვიზიტის ფარგლებში შემოსავლების სამსახურის ხელმძღვანელმა არსებული ინფრასტრუქტურა დაათვალიერა და სტაციონარული რენტგენოინსპექტირების სკანერის მუშაობის პროცესს დაესწრო.

კახეთის რეგიონში სტუმრობისას, უწყების ხელმძღვანელმა ასევე მოინახულა თელავის მოქალაქეთა მომსახურების სერვისცენტრი, სადაც მომსახურების დეპარტამენტის, საგადასახადო მონიტორინგისა და ვალის მართვის დეპარტამენტის თანამშრომლებს შეხვდა. როგორც მან აღნიშნა, რეგიონებში შეხვედრები რეგულარული ხასიათის იქნება და აქტიური კომუნიკაცია თანამშრომლებთან მომავალშიც გაგრძელდება.