საქართველოს გენერალურ პროკურატურაში „ახალგაზრდა კრიმინოლოგთა ჯგუფის“ მოსწავლეებთან და სტუდენტებთან სწავლება ჩატარდა
საქართველოს გენერალური პროკურატურის ორგანიზებით სტუდენტური ორგანიზაციის - „ახალგაზრდა კრიმინოლოგთა ჯგუფის“ - მოსწავლეებთან და სტუდენტებთან ნაფიც მსაჯულთა სასამართლო უნარების თემაზე სწავლება ჩატარდა.
როგორც პროკურატურის პრესსამსახურის განცხადებაშია აღნიშნული, სწავლების ფარგლებში ნაფიც მსაჯულთა სასამართლოს განსახილველ საქმეებზე ზედამხედველობისა და სახელმწიფო ბრალდების ეფექტიანი მხარდაჭერის უზრუნველყოფის დეპარტამენტის უფროსმა ნინო აღლემაშვილმა და ამავე დეპარტამენტის პროკურორმა ირაკლი ქარდავამ კრიმინოლოგთა ჯგუფის წევრებთან ისაუბრეს ნაფიც მსაჯულთა შერჩევის პრინციპებზე, შესავალი და დასკვნითი სიტყვის მომზადებაზე, ასევე პირდაპირი და ჯვარედინი დაკითხვის ტექნიკებზე.
სწავლება ინტერაქციულ რეჟიმში წარიმართა და მონაწილეებმა მათთვის საინტერესო კითხვებზე ამომწურავი პასუხები მიიღეს.
სწავლება ოთხეტაპიანი იყო და მასში 80-მდე მოსწავლემ და სტუდენტმა მიიღო მონაწილეობა. სწავლების მიზანს მონაწილეებისთვის ნაფიც მსაჯულთა სასამართლო უნარების თემაზე თეორიული და პრაქტიკული გამოცდილების გაზიარება წარმოადგენდა.
აღსანიშნავია, რომ საქართველოს პროკურატურა სტუდენტებთან და მოსწავლეებთან ინფორმაციულ შეხვედრებს აქტიურად ატარებს და მზადყოფნას გამოთქვამს, რომ ახალგაზრდულ ორგანიზაციებთან ერთად მომავალშიც აქტიურად გააგრძელოს ისეთი მიზნობრივი ღონისძიებების ჩატარება, რომელიც ახალგაზრდების პროფესიულ განვითარებას და მათი სამართლებრივი ცნობიერების ამაღლებას შეუწყობს ხელს.
