გივი მიქანაძემ სამეცნიერო კონფერენციაში „ოკუპირებული აფხაზეთი – კულტურული მემკვიდრეობა, წარსული და თანამედროვეობა” მონაწილეობა მიიღო
საქართველოს განათლების, მეცნიერებისა და ახალგაზრდობის მინისტრმა გივი მიქანაძემ მონაწილეობა მიიღო სამეცნიერო კონფერენციაში „ოკუპირებული აფხაზეთი – კულტურული მემკვიდრეობა, წარსული და თანამედროვეობა”, რომელიც ეძღვნებოდა სრულიად საქართველოს კათოლიკოს-პატრიარქის, უწმინდესისა და უნეტარესის ილია II-ის აღსაყდრებიდან 48-ე და დაბადებიდან 93-ე წლისთავს.
ღონისძიებაზე გივი მიქანაძემ დამსწრე საზოგადოებას სიტყვით მიმართა და კონფერენციის მნიშვნელობაზე ისაუბრა.
„ეს თარიღი განსაკუთრებულია არა მხოლოდ ეკლესიისთვის, არამედ მთელი ჩვენი სახელმწიფოსა და საზოგადოებისათვის. პატრიარქის მრავალწლიანი მსახურება განუყოფლად უკავშირდება ეროვნული თვითმყოფადობის, სულიერი ფასეულობებისა და კულტურული მემკვიდრეობის დაცვას — იმ ღირებულებებს, რომელთა მნიშვნელობა განსაკუთრებით თვალსაჩინო და ფასდაუდებელია, როდესაც ვსაუბრობთ ოკუპირებულ აფხაზეთზე”, - განაცხადა მინისტრმა.
კონფერენციის მონაწილეებს სიტყვით მიმართეს საქართველოს სამოციქულო ავტოკეფალიური მართლმადიდებელი ეკლესიის საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა შიომ (მუჯირი), აფხაზეთის ავტონომიური რესპუბლიკის მთავრობის თავმჯდომარემ გიორგი ჯინჭარაძემ, შერიგებისა და სამოქალაქო თანასწორობის საკითხებში სახელმწიფო მინისტრის პირველმა მოადგილემ ლია გიგაურმა.
კონფერენცია გაიმართა საქართველოს საპატრიარქოს ორგანიზებითა და წმინდა გიორგი მთაწმინდელის სახელობის სამეცნიერო ცენტრის ფინანსური მხარდაჭერით. ღონისძიების მიზანს წარმოადგენდა ოკუპირებულ აფხაზეთში არსებული ისტორიულ-კულტურული პროცესების, კულტურული მემკვიდრეობის დაცვის, იდენტობის, ენობრივი და საინფორმაციო პოლიტიკის, ასევე დიასპორებისა და რეპატრიაციის საკითხების აკადემიური და ინტერდისციპლინური განხილვა.
კონფერენციის ფარგლებში გამართულ სამეცნიერო სესიებში მონაწილეობა მიიღეს ქართველმა და უცხოელმა მკვლევრებმა, ისტორიისა და ჰუმანიტარულ მეცნიერებათა დარგის მეცნიერებმა, უნივერსიტეტების პროფესორ-მასწავლებლებმა. მოხსენებები შეეხებოდა აფხაზეთის ისტორიის ფალსიფიკაციის პრობლემატიკას, კულტურული მემკვიდრეობის ძეგლების მდგომარეობას ოკუპაციის პირობებში, გალისა და სამურზაყანოს ენობრივ-იდენტობის საკითხებს, ასევე ქართულ-აფხაზური ურთიერთობების თავისებურებებს დიასპორებში.
