ბათუმის იუსტიციის სახლში, 8 ეკომიგრანტი ოჯახისთვის საკუთრების რეგისტრაციის პროცედურა გაიმართა. ოჯახებს ახალი საცხოვრისი აჭარის ჯანდაცვის მინისტრის მოადგილემ, ედუარდ ნაკაშიძემ მიულოცა. ინფორმაციას აჭარის ჯანდაცვის სამინისტრო ავრცელებს. 

„აჭარის ჯანმრთელობისა და სოციალური დაცვის სამინისტროს თანადაფინანსებით, წელს უსაფრთხო საცხოვრისი ჯამში 58-მა ეკომიგრანტმა ოჯახმა უკვე შეიძინა. მარტის თვეში, 1 მილიონ 500 00 ლარით გაიზარდა ეკომიგრანტი ოჯახების საცხოვრებლით უზრუნველყოფის პროგრამის ბიუჯეტი. ამ მიმართულებით ჯამში 7 მილიონ 740 000 ლარი გამოიყოფა“- აღნიშნა მინისტრის მოადგილემ, ედუარდ ნაკაშიძემ.

2025 წელს, „ეკომიგრანტი ოჯახების საცხოვრებლით უზრუნველყოფის“ პროგრამაში განხორციელებული კიდევ ერთი ცვლილების თანახმად, ბენეფიციარს საშუალება აქვს პროგრამის ფარგლებში გათვალისწინებული თანხით, საკუთრებაში რეგისტრირებულ მიწის ნაკვეთებზე, შესაბამისი მუნიციპალიტეტის მიერ გაცემული მშენებლობის ნებართვის საფუძველზე ააშენოს საცხოვრებელი სახლი.

მიმდინარე წელს, სამინისტროს თანადაფინანსებით უსაფრთხო საცხოვრისს სტიქიის შედეგად დაზარალებული 150 ოჯახი შეიძენს.