ქუთაისში არსებული გენერალ გიორგი კვინიტაძის სახელობის კადეტთა სამხედრო ლიცეუმის წარმომადგენლები მოსწავლეთა ახალი ნაკადის მიღების მიზნით, საქართველოს ქალაქებისა და მუნიციპალიტეტების სკოლებში საინფორმაციო შეხვედრებს მართავენ. ინფორმაციას თავდაცვის სამინისტრო ავრცელებს.

უწყების ცნობით, დღეს ლიცეუმის წარმომადგენლები თბილისის 72-ე საჯარო სკოლას ესტუმრნენ და მოზარდებს კადეტთა სამხედრო ლიცეუმის შესახებ სრული ინფორმაცია მიაწოდეს.

კადეტებმა მე-8 და მე-9 კლასის მოსწავლეებს სამხედრო ლიცეუმში სწავლისა და ცხოვრების პირობები გააცნეს და იმ გამორჩეულ გარემოსა და შესაძლებლობებზე ესაუბრნენ, რომელსაც ლიცეუმი თითოეულ კანდიდატს სთავაზობს. კადეტებმა ახალგაზრდებს დღის განრიგი გააცნეს და სამხედრო სასწავლებლის შესახებ პრეზენტაცია წარუდგინეს. შეხვედრა კითხვა-პასუხის რეჟიმში წარიმართა.

თბილისისა და რეგიონების საჯარო სკოლებში საინფორმაციო შეხვედრები 5 ივნისს, ქუთაისში, კადეტთა სამხედრო ლიცეუმში ღია კარის დღით დასრულდება. ღია კარის დღეზე ლიცეუმში სწავლის მსურველ ახალგაზრდებს სასწავლებლის ინფრასტრუქტურის დათვალიერების და შესაძლებლობების გაცნობის საშუალება ადგილზე ექნებათ.