ვოლსკი ოპოზიციაზე: ყველა ცდილობს, მოაწონოს თავი დამფინანსებელს, შეჯიბრება მიმდინარეობს იმაზე, ვის მეტი დესტაბილიზაციის რესურსი გააჩნია

„ყველა ცდილობს, მოაწონოს თავი დამფინანსებელს - მათ, ვინც არა მარტო აფინანსებს, არამედ რევოლუციურ გეგმებსაც უწერს და შემდეგ ამაზე პასუხს სთხოვს“, - ამის შესახებ საქართველოს პარლამენტის პირველმა ვიცე-სპიკერმა გია ვოლსკიმ ოპოზიციაზე საუბრისას განაცხადა.
ვოლსკის თქმით, ოპოზიციის მთავარი მიზანი ქვეყნის დაზიანებაა.
„ყველა ცდილობს, თავი წარმოაჩინოს, როგორც უფრო ხისტი, უფრო მეტი დამანგრეველი ძალის მქონე. ასე რომ, კამათი არსებობს, რასაკვირველია, მაგრამ მათი მთავარი ამოცანა არის ქვეყნის დაზიანება, ეჯიბრებიან ერთმანეთს, ვის უფრო მეტი რესურსი გააჩნია ამისათვის.
ზოგნი ფიქრობენ, რომ ადგილობრივი თვითმმართველობის არჩევნებში მონაწილეობის მიღება უფრო მეტი ზიანის მომტანი იქნება ქვეყნისთვის, ვინაიდან პოლიტიკურ პროცესში იქნებიან ჩართულნი.
ზოგი ფიქრობს, რომ გამიჯნულები და ქუჩაში გამოსულები უფრო მეტი ზიანის მომტანები იქნებიან. შეჯიბრება მიმდინარეობს იმაზე, ვის მეტი დესტაბილიზაციის რესურსი გააჩნია“, - აღნიშნავს მმართველი გუნდის დეპუტატი.