საქმეები, რაც უკვე მოისმინა საჯარო სხდომის ფორმატში ჩვენმა საზოგადოებამ და განსაკუთრებით იმ ახალგაზრდა თაობამ, რომელიც იმ პერიოდში, ალბათ, არასრულწლოვანი იყო, ან მცირეწლოვანი, ადასტურებს იმას, რომ მოცემული ძალის ხელისუფლებაში დაბრუნება არავითარ შემთხვევაში არ შეიძლება, - განაცხადა „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებით საგამოძიებო კომისიის“ ხელმძღვანელმა, პარლამენტის ვიცე-სპიკერმა თეა წულუკიანმა გადაცემაში „იმედი LIVE“.

თეა წულუკიანის თქმით, ახალგაზრდებმა ყველა ღონეს უნდა მიმართონ იმისთვის, რომ ვისაც ამის ინტერესი და სურვილი აქვს, მაქსიმალურად მაღალ პროფესიულ დონეზე მოემზადოს და როცა ამის დრო დადგება, „ქართული ოცნებისგან“ ხელისუფლება გადაიბაროს. 

„არაერთი სხდომა გვქონდა, თუმცა ეს, ალბათ, ზღვაში წვეთია იმასთან შედარებით, რა მასალა და ფაქტებიც არსებობს იმ ცხრაწლიან პერიოდთან მიმართებით, როდესაც „ნაციონალური მოძრაობა“ მართავდა სააკაშვილის ხელმძღვანელობით საქართველოს. მიუხედავად ამისა, ის საქმეები, რაც უკვე მოისმინა საჯარო სხდომის ფორმატში ჩვენმა საზოგადოებამ და განსაკუთრებით იმ ახალგაზრდა თაობამ, რომელიც იმ პერიოდში, ალბათ, არასრულწლოვანი იყო, ან მცირეწლოვანი, ადასტურებს იმას, რომ მოცემული ძალის ხელისუფლებაში დაბრუნება არავითარ შემთხვევაში არ შეიძლება და რომ ყველა ახალგაზრდამ და ახალგაზრდაში ვგულისხმობ ჩემზე და ჩვენზე უმცროს ადამიანებს, ყველა ღონეს უნდა მიმართონ იმისათვის, რომ ვისაც ამის ინტერესი და სურვილი აქვს, მაქსიმალურად მაღალპროფესიულ დონეზე მოემზადოს ქვეყნის მართვისთვის და როცა ამის დრო დადგება „ქართული ოცნებისგან“ ხელისუფლება გადაიბაროს.

ჩვენ რეალურად ბიძინა ივანიშვილმა, რომელმაც მაშინდელი ოპოზიციური ძალები, ქუჩის ოპოზიციას გვეძახდა სააკაშვილი, გაგვაერთიანა. სწორედ ივანიშვილმა მოახერხა ის, რომ დაასრულა ის უბედურება, ადამიანები, რომლებიც ჩვენთან კომისიაზე მოდიან, სხდომაზე თქვენ ისმენთ პირდაპირი ტრანსლაციის რეჟიმში, რომ ამბობენ, რომ არა 2012 წლის 1-ელი ოქტომბერი, მე დღეს აქ არ ვიჯდებოდი, რომ არა ხელისუფლების ცვლილება, მე არ მეყოლებოდა ოჯახი ცოცხალი და ა.შ. ამიტომ ეს მართლაც გარდამტეხი იყო.

ჩვენ ვართ ის ხელისუფლება, რომელიც მაქსიმუმს აკეთებს კვლავ იმისთვის, რომ ქვეყანამ გააგრძელოს განვითარება, რუსეთის მხრიდან მიმდინარე ოკუპაციის, დასავლეთის ზოგიერთი ქვეყნის მხრიდან უსამართლო თავდასხმებისა და იმ ჩრდილოვანი ძალების მავნებლური პოლიტიკის მიუხედავად, რომლებიც ჩვენს ქვეყანას ებრძვიან. ვფიქრობ, ეს ახალგაზრდებისთვის მნიშვნელოვანია“, - აღნიშნა წულუკიანმა.