პარლამენტის ვიცე-სპიკერმა, „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებით საგამოძიებო კომისიის“ ხელმძღვანელმა თეა წულუკიანმა გადაცემა „იმედი LIVE“-ში განაცხადა, რომ საქართველომ აგვისტოს ომთან დაკავშირებით სტრასბურგისა და ჰააგის სასამართლოში რუსეთის წინააღმდეგ საქმე სწორედ ბიძინა ივანიშვილის დამსახურებით მოიგო. 

„ქართული ოცნების“ ხელისუფლება რომ მოვიდა 2012 წლის 1-ელ ოქტომბერს ხელისუფლების სათავეში, ჩვენ აღმოვჩნდით სამართლებრივად ოკუპანტ სახელმწიფოსთან, რუსეთის ფედერაციასთან რამდენიმე სხვადასხვა სასამართლოში, ჰააგასა და სტრასბურგში, პირისპირ ისე, რომ არავითარი მტკიცებულება იმისა, რომ ჩვენი ჯარი და ჯარისკაცი იყო მართალი, არ გვქონდა. იყო უბრალოდ გაგზავნილი ტექსტები ზურა ადეიშვილის მოადგილის, თინა ბურჯალიანის და სხვათა მიერ. მაგრამ სასამართლოში ერთია, რას წერ სასარჩელო მოთხოვნაში, რას წერ საჩივარში, თუ სარჩელში და მეორეა, რა მტკიცებულებებით ამყარებ იმას, რასაც ამბობ. 

ეს მტკიცებულებები პრაქტიკულად არ არსებობდა. ჩვენ შოკირებულებმა დავინახეთ, რომ შესაძლოა, ჩვენი ჯარი ჰააგაში გამტყუნდეს და სწორედ ბიძინა ივანიშვილის დამსახურებაა, ეს მე შემიძლია, ღიად ვთქვა, როდესაც მან პარტიის ოფისში ჩაატარა თათბირი, გასცა დავალებები და ყველა უწყებამ დაიწყო მტკიცებულებების შეგროვება. უფრო მეტიც, იმ თათბირზე ბატონი ივანიშვილის მიერ ითქვა, რომ იუსტიციის სამინისტროს, რომელსაც მაშინ მე ვხელმძღვანელობდი და დავების წარმოება ჩვენი კომპეტენცია იყო, არავითარ შემთხვევაში, არცერთი მიმართულებით ხელი არ უნდა შეშლოდა, რომ დავები ეწარმოებინა მკაცრად და წმინდად სამართლებრივად, რომ პოლიტიკური კომპონენტი დროებით უნდა გადადებულიყო გვერდზე, ამას ვამბობ საჯაროდ პირველად. ეს იყო სწორედ მისი გადაწყვეტილება. ამან მისცა „ქართული ოცნების“ მაშინდელ მთავრობასა და იუსტიციის სამინისტროს იმის საშუალება, რომ ეს პროცესი ჰააგასა და სტრასბურგში წარმართულიყო წმინდად სამართლებრივი მიმართულებით და ჩვენ, სწორედ „ქართული ოცნების“ მინისტრებს, მთავრობას, დაგვემტკიცებინა, რომ ქართული ჯარი და ჩვენი შეიარაღებული ძალები, თავდაცვის თუ შინაგან საქმეთა სამინისტროსი, იყვნენ რუსეთის პირისპირ მართლები, რომ ჩვენი მოქალაქეები, მშვიდობიანი მოსახლეობა იყო მართალი და მათ განიცადეს ეთნიკური წმენდა, რომ ანწუხელიძე, უშანგი სოფრომაძე და კახაბერ ხუბულური, ჩვენი სამხედრო ტყვეები, რომლებიც აწამეს და მოკლეს, სწორედ ოკუპანტი სახელმწიფოს ხელით იქნენ მოკლულები და რომ რეალურად სახეზე იყო მტრის მხრიდან ომის დანაშაული.

როდესაც ეს შევძელით, ეს იყო პირველი სასამართლო დოკუმენტები, რომლებსაც ვერსად ვერ წავიღებთ და ახალგაზრდა თაობას დავუტოვებთ, მათ სასამართლო გადაწყვეტილებები ექნებათ ხელში და შეძლებენ, თუ ჩვენ ეს ვერ მოვასწარით, მშვიდობიანი და სამართლებრივი გზით გააერთიანონ საქართველო, როცა ამის დრო დადგება.

ეს დოკუმენტები ჩვენ მანამდე არ გვქონდა. ეს მოიტანა „ქართული ოცნების“ ხელისუფლებამ ჰააგასა და სტრასბურგში. ახლა ბევრჯერ ისმის კითხვა, რატომ ახლა და არა მანამდე, სწორედ ამიტომ, რომ მანამდე სასამართლო დავები მოსაგები იყო და რუსეთს ყველა სასამართლო მოვუგეთ. ამის შემდეგ პოლიტიკური შეფასებების დრო დადგა“, - განაცხადა თეა წულუკიანმა.