ორი დღით იყო ადამიანი ჩამოსული, რომელსაც არანაირი პროფესიული კავშირი საქართველოსთან არ ჰქონია და რამდენიმე დღეში გვეუბნებიან, რომ 100-გვერდიანი დასკვნა დაწერა, - განაცხადა ტელეკომპანია „იმედის“ გადაცემაში „ღია ეთერი - დებატები“ საქართველოს პარლამენტის თავმჯდომარე შალვა პაპუაშვილმა პატრიცია გჟებიკზე საუბრისას.

პაპუაშვილის თქმით, ირკვევა, რომ ეს ექსპერტი პირდაპირ არის დაკავშირებული პოლონეთის მთავრობასთან.

„მოკლედ რომ აღვწეროთ ეს მექანიზმი, რომელიც აღმოჩნდა საკმაოდ ბლიც-მექანიზმი, სულ რამდენიმე კვირა, სამი კვირა იყო, თუ არ ვცდები, რაც გაგრძელდა.

ორი დღით იყო ადამიანი ჩამოსული, რომელსაც არანაირი პროფესიული კავშირი საქართველოსთან არ ჰქონია და რამდენიმე დღეში გვეუბნებიან, რომ 100-გვერდიანი დასკვნა დაწერა - დაწყებული, როგორც ის ეძახის, წამების საკითხებით და დასრულებული უმაღლესი განათლების რეფორმით. აღმოჩნდა, რომ ეს ერთი ადამიანი ყველაფერში კომპეტენტურია. შემდეგ ჩვენ გვქონდა ჩვენი კომენტარების გაკეთების შესაძლებლობა. 100-გვერდიანი პასუხი გაიგზავნა შენიშვნებისა, თუ კომენტარი საქართველოს მთავრობის მხრიდან სამშაბათს და ხუთშაბათს ეს დასკვნა გამოვიდა უკვე სხდომაზე. ანუ, ერთი დღეც კი არ დაიტოვა ექსპერტმა, რომ წაეკითხა 100-გვერდიანი პასუხი, დაფიქრებულიყო და გადაეწყვიტა, რამე კორექტივი შეეტანა, თუ არა.

ამას მოჰყვა შემდეგ მეორე ნაწილი, ირკვევა, რომ ეს ექსპერტი პირდაპირ არის დაკავშირებული პოლონეთის მთავრობასთან. ის გახლავთ პოლონეთის საგარეო საქმეთა სამინისტროს მრჩეველთა საბჭოს წევრი, გახლავთ პოლონეთის საგარეო საქმეთა სამინისტროს დაქვემდებარებული და მის კურატორობაში არსებული ერთ-ერთი კვლევითი ორგანიზაციის საბჭოს წევრი. იყო პოლონეთის მხრიდან წარდგენილი შარშან გაეროს წამების კომიტეტში. ანუ, მთლიანად არის პოლონეთის საგარეო საქმეთა სამინისტროსთან, მთავრობასთან დაკავშირებული პირი და, ჰოი, საოცრებავ, ჩვენ ვიცით, რომ ეს მექანიზმი დააინიციირა პოლონეთმა, შემდეგ არ მიიღო მონაწილეობა კენჭისყრაში, რომ მისი კანდიდატი ყოფილიყო ექსპერტად წარმოდგენილი ამ დასკვნის შესადგენად. პოლონეთის მთავრობის პოლიტიკა საქართველოს მიმართ ჩვენ ვიცით. ბატონი სიკორსი დღემდე ფიქრობს და მან საჯაროდ განაცხადა რამდენიმე თვის წინ, რომ მიხეილ სააკაშვილი იყო დემოკრატიის ერთ-ერთი მამოძრავებელი. ეს ჩვენ ვიცით, ერთი. ასევე, ვიცით ჩვენ, პოლონეთის მთავრობის ნდობით აღჭურვილი ექიმები რომ იყვნენ ჩამოსულები მიხეილ სააკაშვილთან და წინდით გაჰქონდათ უჩუმრად ნიმუშები. ასე რომ, ესეც ცალკე საკითხია, რომელიც იწვევს ეჭვს, შინაარსს რომ თავი დავანებოთ“, - აღნიშნა შალვა პაპუაშვილმა.