მათიკაშვილი 21-21 ივნისის აქციებთან დაკავშირებით სტრასბურგის გადაწყვეტილებაზე: არსად წერია დადგენილი ციტირებით, რომ სასამართლომ დაადგინა, რომ ბრძანება არ გაუცია გიორგი გახარიას ტყვიების გამოყენებაზე
„ძალიან მარტივია, ხარ შინაგან საქმეთა მინისტრი, დავუშვათ არ გაგიცია ბრძანება ტყვიების გამოყენებაზე, სულ მცირე, დაუყოვნებლივ, როგორც კი აღმოაჩენდი ამ ყველაფერს, რომ ტყვიების გამოყენება მიმდინარეობს, მეორე დღესვე შიდა გამოძიებას არ დაიწყებ ამასთან დაკავშირებით? ვინ გასცა ბრძანება და ვინ მისცა კონკრეტულ პოლიციელს იმის უფლება, რომ რეზინის ტყვია გამოეყენებინა?“ - ამის შესახებ პარლამენტის საპროცედურო საკითხთა კომიტეტის თავმჯდომარემ დავით მათიკაშვილმა, 2019 წლის 20-21 ივნისის აქციების რეზინის ტყვიებით დაშლაზე და სტრასბურგის გადაწყვეტილებაზე საუბრისას, „ღამის კურიერში“ სტუმრობისას განაცხადა.
მათიკაშვილის თქმით, დიდი პალატის გადაწყვეტილებაში არსად არის ციტირება, თითქოს სასამართლომ დაადგინა, რომ რეზინის ტყვიების გამოყენებაზე ბრძანება გიორგი გახარიას არ გაუცია.
„ტექსტს, რომელიც სტრასბურგის ადამიანის უფლებათა ევროპული სასამართლოს დიდი პალატის გადაწყვეტილებაშია აღნიშნული, ვერც ორგვარად და სამგვარად ვერ წაიკითხავ. ერთგვარად უნდა წაიკითხო, ამას სჭირდება ლოგიკა, ამას სჭირდება ობიექტურობა და მიკერძოებისგან უნდა იყო თავისუფალი.
იქ არსად არ წერია დადგენილი ციტირებით, რომ სასამართლომ დაადგინა, რომ ბრძანება არ გაუცია გიორგი გახარიას [რეზინის] ტყვიების გამოყენებაზე. იქ არის საუბარი, მტკიცებულებები, რომელიც არის წარდგენილი ქართული გამოძიებიდან მათ შორის და თვითონ გახარიას ჩვენება, რომ თვითონ ამბობს, რომ მე არ გამიცია რეზინის ტყვიების გამოყენების ბრძანებაო.
ბევრი რამის თქმა შეუძლია გახარიას, ეს ჩვენ ძალიან კარგად ვიცით, ვნახეთ, მოვისმინეთ. 40-წამიან შუალედში შეუძლია საკუთარი ნათქვამი გადათქვას და საპირისპირო თქვას. დროებითი საგამოძიებო კომისია იყო ძალიან კარგი ლუსტრაცია ამ ყველაფრის. ამიტომ, ლოგიკისგან არიან საერთოდ აცდენილები და ბუნებრივიც არის.
ძალიან მარტივია, ხარ შინაგან საქმეთა მინისტრი, დავუშვათ არ გაგიცია ბრძანება ტყვიების გამოყენებაზე, სულ მცირე, დაუყოვნებლივ, როგორც კი აღმოაჩენდი ამ ყველაფერს, რომ ტყვიების გამოყენება მიმდინარეობს, მეორე დღესვე, შიდა გამოძიებას არ დაიწყებ ამასთან დაკავშირებით? ვინ გასცა ბრძანება და ვინ მისცა კონკრეტულ პოლიციელს იმის უფლება, რომ რეზინის ტყვია გამოეყენებინა?!
ადამიანი, რომელიც ხელმძღვანელობ კონკრეტულ საპოლიციო ღონისძიებას, საპოლიციო ღონისძიების მიმდინარეობისას, ვთქვათ გამოყენებულ იქნა ისეთი სპეცდანიშნულების საშუალებები, რომლის გამოყენების შესახებ ბრძანება შენ არ გაგიცია, პირველი რეაქცია საღად მოაზროვნე ადამიანის, პოლიტიკოსის თუ მინისტრის, არ იქნება გამოძიების დაწყება?“ - აღნიშნა მათიკაშვილმა.
