დარწმუნებული ვარ, რომ ჩვენ ევროკავშირთან გავაგრძელებთ ნორმალურ ფორმაში ურთიერთობებს, თუმცა ამას, ალბათ, გარკვეული დრო დასჭირდება იმისათვის, რომ ჩვენც დავინახოთ ევროკავშირის მხრიდან სურვილი იმისა, რომ საქართველო არის მნიშვნელოვანი პარტნიორი, - განაცხადა გადაცემა „იმედი LIVE“-ში საგარეო საქმეთა მინისტრმა მაკა ბოჭორიშვილმა.

მისი თქმით, გარკვეულ ეტაპზე საქართველოსა და ევროკავშირს შორის ურთიერთობები ძველ ნიშნულს დაუბრუნდება.

„აუცილებელია, მივიდეთ იმ წერტილამდე, რა წერტილშიც ეს ურთიერთობები ერთგვარად ან გაცივდა. სადაც ითქვა, რომ მე არ მექნება დიალოგი საქართველოს ხელისუფლების წარმომადგენლებთან. ეს იყო დაახლოებით ერთი წლის წინ, გასული წლის ივნისში, როდესაც ევროკავშირის მხრიდან ეს გადაწყვეტილება იქნა მიღებული. შემდგომ ვხედავთ ჩვენ მცდელობებს, რომ ეს იმგვარად იყოს შემოტრიალებული და წარმოჩენილი, თითქოს საქართველო არის ამის, ასე ვთქვათ, ამ გადაწყვეტილების უკან და ამ გადაწყვეტილების შემოქმედი.

სამართლიანი ურთიერთობები და სამართლიან ნდობაზე დაფუძნებული ურთიერთობები არის საფუძველი ნებისმიერ სიტუაციაში და ევროკავშირთანაც ასე იქნება. ჩვენ გვაქვს ევროკავშირთან შეთანხმება, რომელსაც ხელი მოვაწერეთ 2014 წელს და მას ჰქვია ასოცირების შეთანხმება. ეს შეთანხმება გამოხატავს ქართული სახელმწიფოს ნებას და ასევე, გამოხატავს ევროკავშირის ნებას და არა მარტო ნებას. იქ არის ვალდებულებები ამ შეთანხმების შესრულებასთან დაკავშირებით და ჩვენი მოლოდინი არის, რომ ევროკავშირის მხრიდან ეს ვალდებულებები შესრულდება, ისევე, როგორც ევროკავშირს აქვს ხოლმე მოლოდინი, რომ ჩვენ შევასრულებთ და ვასრულებთ ჩვენს ვალდებულებებს. ასე რომ, ეს შეთანხმება ერთგვარად, ითვალისწინებს კიდეც დიალოგის ვალდებულებას, ერთად მუშაობის ვალდებულებას და, რა თქმა უნდა, ჩვენ მოლოდინი გვაქვს, რომ რაღაც ეტაპზე მოხდება ნორმალიზება იმ ურთიერთობების იმგვარად, რომ ჩვენ შევძლებთ გავაგრძელოთ ევროკავშირთან მუშაობა და არა რიტორიკა, რომელიც გვესმის ევროკავშირის მხრიდან.

რა თქმა უნდა, ამას სჭირდება მუშაობა, სჭირდება მუშაობა ევროკავშირის წევრ ქვეყნებთან, სჭირდება, რა თქმა უნდა, ევროკავშირის ინსტიტუტებთანაც მუშაობა. თუმცა იმ პირობებში, როდესაც ჩვენ ვხედავთ, მაგალითად, უმაღლესი წარმომადგენლის მხრიდან ცალსახად სურვილს, რომ მხოლოდ და მხოლოდ ნეგატიურ კონტექსტში იყო წარმოჩენილი საქართველო, მხოლოდ და მხოლოდ ცუდი დავინახოთ საქართველოსთან მიმართებით და ეს ერთგვარად არის კონკრეტული ქვეყნების პოლიტიკის გაგრძელება. მე არ დავარქმევდი ამას ევროპის და ევროკავშირის პოლიტიკასაც მთლიანად. კონკრეტული ქვეყნების, კონკრეტული ინტერესების განხორციელება ევროკავშირის ინსტიტუტებში უკვე და ინსტიტუტების მხრიდან საქართველოსთან მიმართებით. დარწმუნებული ვარ, რომ ეს შეიცვლება და დარწმუნებული ვარ, რომ ჩვენ ევროკავშირთან გავაგრძელებთ ნორმალურ ფორმაში ურთიერთობებს თუმცა ამას, ალბათ, გარკვეული დრო დასჭირდება იმისათვის, რომ ჩვენც დავინახოთ ევროკავშირის მხრიდან სურვილი იმისა, რომ საქართველო არის მნიშვნელოვანი პარტნიორი, საქართველო არის კეთილსინდისიერი პარტნიორი და ეს ურთიერთობა გავაგრძელოთ ურთიერთპატივისცემის საფუძველზე. საქართველოს აქვს ამის სურვილი, ეს არსად არ წასულა.

საქართველომ ძალიან კარგად იცის, რა ფასი აქვს ჩვენთვის ევროკავშირში ინტეგრაციას, ევროკავშირთან ურთიერთობებს. თუმცა ჩვენ არ გვსურს ეს საკითხი, რომელიც არის ჩვენი ქვეყნისთვის მნიშვნელოვანი, იყოს გარკვეული ძალების ხელში ინსტრუმენტი იმისათვის, რომ მუდმივად გამოიყენონ საქართველოში ეს საკითხი დესტაბილიზაციის საფუძვლად და ამას ვფიქრობ, რომ სჭირდება გაგება ევროკავშირის მხრიდანაც“, - განაცხადა მაკა ბოჭორიშვილმა.