ვაფასებთ ევროკავშირთან ურთიერთობას, თუმცა ბოლო პერიოდში საქართველოს მიმართ არსებული მიდგომები მიუღებელია, - ამის შესახებ საქართველოს საგარეო საქმეთა მინისტრმა მაკა ბოჭორიშვილმა განაცხადა.

მისი თქმით, ევროკავშირის არასწორი პოლიტიკური მიმართულება თავად ევროპასა და მის ინტერესებს აზიანებს.

„ჩვენ არაერთხელ გვისაუბრია ევროკავშირის სტრუქტურებში მიმდინარე პროცესებზე, იმ პოზიციებზე, რომლებიც ძალიან ხშირად აცდენილია თავად ევროპის ინტერესებს. რა თქმა უნდა, საქართველოს აქვს ინტერესი ევროკავშირთან ურთიერთობების.

ვაფასებთ იმ ურთიერთობას, რომელიც წლების განმავლობაში ჩამოგვიყალიბდა. თუმცა, ის მიდგომები, რაც ევროკავშირის ბიუროკრატიის მხრიდან ბოლო პერიოდში ჩანდა საქართველოს მისამართით, მიუღებელია. ესაა იმ მცდარი პოლიტიკის შედეგები, რასაც ჩვენ დღეს ვხედავთ.

ორმაგი სტანდარტები, არასწორი პოლიტიკური ნაბიჯები უპირველესად, ევროპის რეპუტაციას აზიანებს. ამაზე დღეს ხმამაღლა თუ საუბრობენ, ეს არამხოლოდ საქართველო და მისი ხელისუფლებაა, არამედ სხვებიც.

სხვებიც კარგად ხედავენ, რომ ის არასწორი პოლიტიკური მიმართულებები, რომლებითაც ევროკავშირის პოლიტიკა ხორციელდება, აზიანებს ევროპას და მის ინტერესებს“, - აღნიშნა საგარეო საქმეთა მინისტრმა.