ფრაქცია „ქართული ოცნების“ თავმჯდომარის პირველი მოადგილე ლევან მაჭავარიანი სუსის ყოფილი ხელმძღვანელის გრიგოლ ლილუაშვილის დაკავებას ეხმაურება.

მისი თქმით, მსგავსი ფაქტები პოლიტიკური დარტყმაა „ქართული ოცნების“ ხელისუფლებისთვის, თუმცა, მიუხედავად ამისა, როგორც პასუხისმგებლობიანი გუნდი საზოგადოების და ქვეყნის წინაშე, აგრძელებს უკომპრომისო ბრძოლას კორუფციის წინააღმდეგ.

„საზოგადოება ხედავს, თუ როგორი უკომპრომისო ბრძოლა გვაქვს გამოცხადებული ორგანიზებული დანაშაულის წინააღმდეგ, ნარკორეალიზატორების წინააღმდეგ, კორუფციის წინააღმდეგ. ბატონი ლილუაშვილის დაკავება სწორედ ამაზე მეტყველებს. ჩვენ ვართ პასუხისმგებლობიანი ხელისუფლება. რა თქმა უნდა, ეს არის პოლიტიკური დარტყმა ჩვენი გუნდისთვის, თუმცა ჩვენ ვართ პასუხისმგებლები ჩვენი საზოგადოების წინაშე, ქვეყნის წინაშე და შესაბამისად, რა თქმა უნდა, ჩვენ ვალდებულები ვართ, რომ სადაც ასეთი ნიშნები იკვეთება, წარსული იქნება, აწმყო, თუ მომავალი, აუცილებლად ყველაფერზე მოვახდინოთ რეაგირება“, - განაცხადა ლევან მაჭავარიანმა.

ცნობისთვის, საქართველოს სახელმწიფო უსაფრთხოების სამსახურის ყოფილი ხელმძღვანელი გრიგოლ ლილუაშვილი დაკავებულია. ამის შესახებ საქართველოს პროკურატურაში გამართულ ბრიფინგზე გენერალურმა პროკურორმა გიორგი გვარაკიძემ განაცხადა.

ლილუაშვილს რამდენიმე ეპიზოდში ადანაშაულებენ. მათ შორის არის ქრთამის აღება, ე.წ. ქოლცენტრები და საბავშვო ბაღების მართვის სააგენტოს შესყიდვები.