„ჯერ კამპანია აწარმოვეს, თითქოს ჩვენ ამ რეზოლუციას მხარი დავუჭირეთ, სადაც ჯო უილსონის შეპარებული წინადადება ეწერა ახალ არჩევნებთან დაკავშირებით. ერთწუთიან ტყუილებზე არიან დასულები და შემდეგ გამომჟღავნდა, რომ ჩვენ მხარი არ დაგვიჭერია“, - განაცხადა ფრაქცია „ქართული ოცნების“ თავმჯდომარის მოადგილემ ლევან მაჭავარიანმა.

მისივე თქმით, როდესაც სიმართლე გაირკვა, ახალი ისტერია დაიწყეს, რომ ოცნებას რეზოლუციისთვის მხარი უნდა დაეჭირა, რადგან იქ საქართველოსთვის სასარგებლო პუნქტები იყო, მაშინ როდესაც, მაჭავარიანის თქმით, რეალურად, ყველაფერი ეს ქართულმა ოცნებამ დააინიიცირა.

„შემდეგ, ასწიეს ახალი ისტერია და კამპანია, რომ როგორ არ დაუჭირა „ქართულმა ოცნებამ“ ისეთ რეზოლუციას მხარი, სადაც ეწერა ჩვენთვის სასარგებლო რაღაცები ოკუპაციასთან დაკავშირებით, რუსეთთან დაკავშირებით, სირიამ რომ უნდა გაიწვიოს ის აღიარებები და ასე შემდეგ და მერე ამაზე ააგეს თავისი დღის წესრიგი. ეს ყველა პუნქტი და ყველა აბზაცი, რაც ახლა მე ჩამოვთვალე, ჩვენი დელეგაციის მხრიდან იყო ჩაწერილი და რა თქმა უნდა, როდესაც აბზაც-აბზაც ხდებოდა ყველა პუნქტის გავლა, ჩვენი დელეგაცია თავისთავად, დაეთანხმა ამ ყველა აბზაცს და პუნქტს, ვინაიდან ჩვენივე ინიციირებული იყო“, - განაცხადა მაჭავარიანმა.

შეგახსენებთ, რომ ოპოზიციურმა მედიამ გაავრცელა დეზინფორმაცია, თითქოს ქართულმა მხარემ ეუთოს საპარლამენტო ასამბლეაზე მიღებულ რეზოლუციას მხარი დაუჭირა. ასევე, ითქვა, რომ „ქართულმა ოცნებამ” მხარი არ დაუჭირა დეკლარაციას, რომელიც სირიას აფხაზეთისა და ცხინვალის რეგიონის აღიარების გაუქმებისკენ მოუწოდებს. ცნობისთვის, ეს შესწორება დოკუმენტში სწორედ, ქართული მხარის მოთხოვნით შევიდა.