სამწუხაროდ, ევროპაში რამდენიმე ქვეყანაა, რომელიც თავის სუვერენიტეტს იცავს და ეროვნულ ინტერესებს ატარებს. ფიცოს ინტერვიუ რომ გავიხსენოთ, სლოვაკეთი საქართველოთი რომ შეგეცვალათ, იფიქრებდით, რომ საქართველოზე საუბრობდა. ევროპაში მართლა რეალური პრობლემებია, – ამის შესახებ ფრაქცია „ქართული ოცნების“ თავმჯდომარის მოადგილემ, ლევან მაჭავარიანმა საქართველოს პირველ არხს განუცხადა.

ლევან მაჭავარიანის თქმით, ეს მხოლოდ ფიცოს შეფასება არ არის, ამაზე აშშ-ის ახალი ადმინისტრაციაც საუბრობს.

„გაიხსენეთ, ცოტა ხნის წინ საფრანგეთში რა მოხდა, როცა მარინ ლე პენს საქმიანობა აუკრძალეს, რომელიც საპრეზიდენტო მარათონში სარკოზის მთავარი კონკურენტი იქნებოდა. რუმინეთში განვითარებული მოვლენები გაიხსენეთ, როცა საკონსტიტუციო სასამართლოს პირველი ტურის შედეგები გააუქმებინეს, რადგან პირველ ტურში გამარჯვებული კანდიდატი ბრიუსელს არ აწყობდა. ამ მოსამართლეების ნაწილი სოროსის ფონდში მაღალ პოზიციებზე საუბრობდნენ. ანალოგიურ მოვლენებს სერბეთში, უნგრეთში ვხედავდით. სხვათა შორის, თურქეთში აქციები ანალოგიური სცენარით ვითარდება. რა თქმა უნდა, ეს ყველაფერი ერთი და იმავე ძალების ხელწერაა – „დიფ სთეითის“. მათ ხელისუფლებაში ისეთი ლიდერების ყოფნა არ აწყობთ, რომლებიც მათ გლობალისტურ ზრახვებს ეწინააღმდეგებიან. ასევე, ვინც უკრაინაში ომს ეწინააღმდეგება და ქვეყნის ინტერესებს იცავს, ვისაც მშვიდობა უნდა და არა არალეგალური მიგრაცია“, – განაცხადა ლევან მაჭავარიანმა.