დედაქალაქის მერი კახა კალაძე მიიჩნევს, რომ საქართველოს განათლების სისტემაში დაგეგმილი რეფორმა, რაზეც ქვეყნის პრემიერ-მინისტრმა შესაბამის პრეზენტაციაზე ისაუბრა, ძალიან მნიშვნელოვანია და მთავარია მისი
განხორციელება.

როგორც კახა კალაძე მიიჩნევს, ეს საკითხი ერთ-ერთი სერიოზული გამოწვევაა ქვეყანაში და რეფორმაც ოდნავ დაგვიანებულია.

„რეფორმა ძალიან მნიშვნელოვანია, ცოტა დაგვიანებული, მაგრამ მთავარია აღნიშნული რეფორმის განხორციელება მოხდეს. პრემიერმა ძალიან ვრცლად ისაუბრა გამოწვევებზე, იმაზე, თუ რა უნდა გაკეთდეს მომდევნო წლების განმავლობაში.

მგონია, ყველა ვთანხმდებით, რომ ერთ-ერთი სერიოზული გამოწვევა არის აღნიშნული მიმართულება ქვეყანაში. შესაბამისად, ჩვენ ჩვენი შვილებისთვის, მომავალი თაობებისთვის ყველაფერი უნდა გავაკეთოთ, რომ მივცეთ
შესაძლებლობა, ღირსეული განათლება მიიღონ. შემდეგ ყველაზე მთავარი, რაც არის - განათლებამიღებული ადამიანების ცოდნა გამოვიყენოთ ისევ და ისევ ჩვენი ქვეყნის განვითარებისთვის, იმისთვის, რომ საქართველოში შეიქმნას კიდევ უფრო მეტი კეთილდღეობა, მოხდეს ეკონომიკური განვითარება. ამას სჭირდება განათლებული, წარმატებული ახალგაზრდები და ადამიანები. შესაბამისად, განათლების რეფორმის განხორციელება იმ ფორმით, რაზეც პრემიერ-მინისტრი საუბრობდა პრეზენტაციაზე, და მან დააფიქსირა, რომ ამასთან დაკავშირებით კომუნიკაცია საზოგადოებასთან გაგრძელდება, არის ძალიან მნიშვნელოვანი“, - განაცხადა კახა კალაძემ.