„ნებისმიერ სამართლებრივ სახელმწიფოში უსაფრთხოება არის ერთ-ერთი პრიორიტეტული საკითხი. რა თქმა უნდა, საქართველოშიც ასეა, მათ შორის, საზღვრების კონტროლი“, - განაცხადა „ხალხის ძალის" ლიდერმა, დეპუტატმა გურამ მაჭარაშვილმა, რომელიც სასაზღვრო გამტარ პუნქტ „დარიალზე“ მყოფი პირების უკრაინაში გაყვანის საკითხს გამოეხმაურა.

მისივე თქმით, ნებისმიერი ქვეყნიდან, ნებისმიერი სახელმწიფოდან მოქალაქეების შემოსვლა ბუნებრივია, კონტროლდება საქართველოს შესაბამისი უწყებების მხრიდან.

„თუ რომელიმე სახელმწიფოს რომელიმე მოქალაქეზე არის რაიმე ტიპის ინფორმაცია, რაც შეიძლება იყოს იმის ალბათობა, რომ სახელმწიფო უსაფრთხოების სამსახურის ინტერესებს ეწინააღმდეგებოდეს, ბუნებრივია, ასეთ შემთხვევაში უწყება იღებს შესაბამის გადაწყვეტილებას. ამიტომ, კიდევ ერთხელ, ჩვენ ვიცით, რომ უკრაინელები არიან ამ შემთხვევაში საზღვართან და არსებობს უწყების მიერ შესაბამისი ინფორმაციები, რომელიც საჭიროებს გადამოწმებას“, - განაცხადა მაჭარაშვილმა.

შეგახსენებთ, შინაგან საქმეთა მინისტრის მოადგილემ ალექსანდრე დარახველიძემ სამინისტროში გამართულ ბრიფინგზე სასაზღვრო გამტარ პუნქტ „დარიალზე“ მყოფ პირებთან დაკავშირებით განაცხადა, რომ საქართველოს შინაგან საქმეთა სამინისტრო კიდევ ერთხელ გამოხატავს სრულ მზადყოფნას, განახორციელოს მის კომპეტენციას მიკუთვნებული ყველა შესაბამისი ღონისძიება და ხელი შეუწყოს უკრაინულ მხარეს ე.წ. ნეიტრალურ ზონაში მყოფი პირების სამშობლოში დაბრუნების პროცესში.