გლობალური შიმშილის 2026 წლის ანგარიშით, საქართველო მსოფლიოს წამყვან ქვეყნებს შორის დასახელდა. საერთაშორისო შემფასებელი ცენტრების კვლევაში, რომელიც მოსახლეობის კვებასა და ბავშვთა ჯანმრთელობის 4 ძირითად ინდიკატორს ეფუძნება, საქართველომ საუკეთესო შეფასება, 5%-ზე დაბალი მაჩვენებელი მიიღო და საუკეთესო შედეგის მქონე 24 ქვეყანას შორის მოხვდა.

ევროპის ბოლო სამეულში უკრაინა, მოლდოვა და ალბანეთია. საქართველო პირველ პოზიციაზეა პრობლემისგან თავისუფლებით. კვლევის მიხედვით 2012 წელს საქართველო ამ ინდექსით ევროპის უკანასკნელ ხუთეულში იმყოფებოდა.

„ქართული ოცნების“ შეფასებით, კვლევამ კიდევ ერთხელ ნათლად აჩვენა, რომ საქართველო ყველა კომპონენტში უსწრებს მოლდოვასაც და უკრაინასაც, თუმცა ევროკომისია წარმატების მაგალითებად მაინც ამ ქვეყნებს ასახელებს, რაც მიკერძოებული და უსამართლო მიდგომაა.

„ჩვენი ქვეყანა არის საუკეთესო ქვეყნებში აი ამ გლობალური შიმშილის ინდექსით, რაც მიუთითებს იმაზე, რომ სწორი მიმართულება აქვს აღებული ჩვენს ხელისუფლებას, რომელიც ორიენტირებულია თითოეული მოქალაქის მდგომარეობის გაუმჯობესებაზე, თითოეული მოქალაქის კეთილდღეობაზე. გახსოვთ თქვენ, რომ ევროპის არაერთი ბიუროკრატი ძალიან ხშირად საუბრობდა ხოლმე იმაზე, რომ თითქოს ჩვენ, ჩვენთან დემოკრატიული უკუსვლა იყო და უკრაინა და მოლდოვა გვასწრებდნენ ბევრი კვლევით. გადახედეთ ახლა, ჩვენი ქვეყანა არის საუკეთესო ქვეყნებს შორის ევროპაში ამ გლობალური შიმშილის ინდექსით და ამ დროს უკრაინა და მოლდოვა ალბანეთთან ერთად არის უკანასკნელ სამეულში, რაც ძალიან გულდასაწყვეტია, მაგრამ აჩვენებს, რომ როგორი სიცრუის ტირაჟირებას ახდენდნენ ევროპელი ბიუროკრატები, როდესაც საქართველოს მიმართებით ასეთი არასწორი დამოკიდებულება ჰქონდა და არასწორ დამოკიდებულების პროპაგანდას აკეთებდნენ“, - განაცხადა პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარის მოადგილე გიორგი სოსიაშვილმა.