მცდელობა, რომ საპატრიარქოს რეიტინგი იყოს დაცემული, კრახით დამთავრდა. ამის გაკეთება შეუძლებელია, რადგან საუბარი არ არის პიროვნებებზე, ეს არის ტრადიცია და ისტორიული მემკვიდრეობა, - ამის შესახებ საქართველოს პარლამენტის პირველმა ვიცე-სპიკერმა გია ვოლსკიმ განაცხადა.

მისი თქმით, ეს სწორედ ის ფუნდამენტია, რაზეც სახელმწიფო საუკუნეების განმავლობაში იდგა - დაშლილი სახელმწიფოც კი ეკლესიის გარშემო იყო გაერთიანებული.

„საქართველოს საპატრიარქოს ბევრი პრობლემა დახვდა, მაგრამ ყველა გადალახა. დღეს მთავარ მიმართულებად შერჩეულია საპატრიარქოში დაპირისპირების ინიცირება. სამწუხაროდ, ამაში გარკვეული სასულიერო პირებიც არიან ჩართული, მაგრამ იმ ზღვა ხალხის შეკვეთა სხვაა, რომელმაც ჩვენს პატრიარქს პატივი მიაგო.

ქართველთა შეკვეთაა, რომ ეკლესიაში შენარჩუნებული იყოს კონსენსუსი და საკუთარი ქვეყნის მიმართ პატრიოტული დამოკიდებულება. ეს ის სიმბოლოა, რომელიც ეკლესიას მოჰყვება და რის გამოც მისი რეიტინგი უცვლელად მაღალია. რასაკვირველია, ამის შერყევის მცდელობაში ცალკეული გამოვლინებები იქნება.

ნებისმიერ ქვეყანაში რწმენა და ეკლესია ერთ-ერთი მყარი ფუნდამენტია, რაზეც სახელმწიფო, მისი სტაბილურობა და განვითარების პერსპექტივაც დგას. საქართველოში ეკლესიის როლი გამორჩეულია. რასაკვირველია, ეს იმ მტრებს არ აწყობთ, რომელთაც უნდათ, საქართველო ცალ ფეხზე ან მუხლებზე მდგომი იხილონ.

პოლიტიკური ამოცანებია სხვა და იმ დამოკიდებულებისა და პათოსიდან განსხვავდება, რაც ქართველ ერს აქვს. როგორმე ამის მოშლა უნდათ.

სამწუხაროდ, ბოლო პერიოდში გამოჩნდა, რომ ზოგიერთი სასულიერო პირი ცდილობს, როგორმე ფეხი აუწყონ იმ პოლიტიკურ ტრენდს და სცენარს, რომელიც საქართველოს წინააღმდეგ არის შექმნილი“, - აღნიშნა ვოლსკიმ.