„ლისის ტბის“ ყოფილმა მესაკუთრემ, ბიზნესმენმა რამაზ ახვლედიანმა, პარლამენტის დროებითი საგამოძიებო კომისიის სხდომაზე, მის საკუთრებაში არსებული ქონების იძულების წესით დათმობა და მასზე ზეწოლის ფაქტები გაიხსენა.

როგორც ახვლედიანმა აღნიშნა, ფინანსურ პოლიციაში მას დაემუქრნენ, რომ მეგობარს, ვინც მანქანასთან ელოდებოდა, მანქანის მოპარვას „შეტენიდნენ“, ხოლო თავად ბიზნესმენს იარაღის გაყიდვის მუხლით გაუშვებდნენ ციხეში.

„როდესაც მივდიოდი, მანქანას ფინანსური პოლიციის გარეთ, ავტოსადგომთან ვაჩერებდი. ერთ-ერთ შეხვედრაზე მეგობარი მომყვებოდა, ვთხოვე, რომ ყველაფერი ხდება, არ გააღონ, რამე არ ჩადონ და მაინც შორიახლოს იყავი, მანქანასთან ნუ გაჩერდები, თუ რაღაც ასეთს შეატყობ, მაინც სურათები გადაიღე, მომავალში გამომადგება-მეთქი. მითხრეს, შენი მეგობარი რომ „იტუზება“ მანქანასთან, შენ ხომ არ გგონია, რამის პრობლემა გვაქვს, ჩავალთ ახლა, მაგ ბიჭს მანქანის მოპარვას, ჟარგონით მითხრეს „შევტენითო“, მერე შენი მანქანიდან გასაბერ ტანკს გადმოვიღებთ, გავასროლინებთ და წახვალ იარაღის გაყიდვის მუხლით ციხეზეო. იმასაც გეტყვით, რომ გაფრთხილებული ვიყავი და დაკითხვებზე როგორც ახალ პიჯაკებს აქვთ, ამოკერილი ჯიბეებით მივდიოდი, წყალს არ ვსვამდი და რაღაცებს ვარიდებდი თავს, რომ მერე რაიმე ისეთ შარში არ გავხვეულიყავი, რაც უფრო ძნელი გამოსასწორებელი იქნებოდა.“ - განაცხადა რამაზ ახვლედიანმა.