სპორტის კომიტეტმა „საქართველოს საუნივერსიტეტო სპორტის ფედერაციის“ მიერ 2021-2023 წლებში გაწეული საქმიანობის შესახებ ინფორმაცია მოისმინა
სპორტის კომიტეტმა „საქართველოს საუნივერსიტეტო სპორტის ფედერაციის“ მიერ 2021-2023 წლებში განხორციელებული და მიმდინარე წელს დაგეგმილი საქმიანობის შესახებ ინფორმაცია მოისმინა.
„საუნივერსიტეტო სპორტის ფედერაციის“ წარმომადგენლებმა ანა კაკაბაძემ და შოთა ბერუაშვილმა დეტალური ინფორმაცია წარადგინეს ჩატარებული ტურნირების შესახებ, რომელშიც 50 000-მდე სტუდენტი მონაწილეობდა.
„საქართველოს საუნივერსიტეტო სპორტის ფედერაცია“ ყოველწლიურად ატარებს ტურნირებს და ღონისძიებებს სპორტის სხვადასხვა სახეობაში.
ფედერაცია ევროპის საუნივერსიტეტო სპორტის ასოციაციის (EUSA) და საერთაშორისო საუნივერსიტეტო სპორტის ფედერაციის (FISU) წევრია და მჭიდროდ თანამშრომლობს საერთაშორისო პარტნიორ ორგანიზაციებთან.
შესაბამისად, ქართველი სტუდენტები სხვადასხვა საერთაშორისო ასპარეზობებში მონაწილეობენ და ხშირად დიდ წარმატებებსაც აღწევენ.
„საქართველოს საუნივერსიტეტო სპორტის ფედერაცია“ დარეგისტრირებულია „ევროპის უნივერსიადა 2024"-ზე, რომელიც 11-27 ივლისს, უნგრეთში ჩატარდება.
ქართველი სტუდენტები მონაწილეობას მიიღებენ ძიუდოში, ტაეკვანდოსა და კიკბოქსინგში. ასევე, იგეგმება მონაწილეობა ქვიშის სახეობებში მსოფლიო სტუდენტურ ჩემპიონატში, რომელიც მიმდინარე წლის სექტემბერში ბრაზილიაში ჩატარდება.
სპორტის კომიტეტის თავმჯდომარემ ირაკლი მეძმარიაშვილმა ფედერაციას გაწეული საქმიანობისთვის მადლობა გადაუხადა. მისივე შეფასებით, საერთაშორისო უნივერსიადაზე სტუდენტების მონაწილეობას ძალიან დიდი მნიშვნელობა აქვს.