უკრაინა გათბობის სეზონისთვის გაზის მიწოდების კიდევ ერთ მარშრუტზე შეთანხმდა. ამის შესახებ უკრაინის პრეზიდენტმა ვოლოდიმირ ზელენსკიმ განაცხადა.

„...ჩვენ მოვამზადეთ შეთანხმება საბერძნეთთან უკრაინისთვის გაზის მიწოდების შესახებ. ეს იქნება კიდევ ერთი გაზმომარაგების მარშრუტი, რათა ამ ზამთარში მაქსიმალურად უზრუნველვყოთ უკრაინის გაზის იმპორტის მარშრუტები“, - დააზუსტა პრეზიდენტმა.

სახელმწიფოს მეთაურმა განაცხადა, რომ უკვე მიღწეულია შეთანხმებები გაზის იმპორტის დაფინანსების შესახებ, რათა კომპენსაცია გაუწიოს უკრაინის წარმოების დანაკარგებს რუსული დარტყმების შედეგად.

„ჩვენ დავფარავთ გაზის იმპორტის თითქმის 2 მილიარდი ევროს საჭიროებას. უკრაინის მთავრობამ გამოყო თანხები იმპორტის დასაფინანსებლად, ევროპელი პარტნიორები ეხმარებიან, ევროპული ბანკები ევროკომისიის გარანტიის ქვეშ არიან, უკრაინული ბანკებიც ეხმარებიან, ნორვეგია ეხმარება და აქტიური მუშაობა გრძელდება ამერიკელ პარტნიორებთან - სრული დაფინანსება უზრუნველყოფილი იქნება“, - ხაზგასმით აღნიშნა მან.

ზელენსკიმ მადლობა გადაუხადა ყველას, ვინც უკრაინელებს გათბობის სეზონზე სირთულეების დაძლევაში ეხმარება.

ცნობისთვის, უკრაინა ყოველდღიურად უნგრეთიდან თითქმის 10 მილიონ კუბური მეტრი გაზის, პოლონეთიდან დაახლოებით 8 მილიონი კუბური მეტრის და სლოვაკეთიდან დაახლოებით 5 მილიონი კუბური მეტრის იმპორტს ახორციელებს.