ზელენსკი ტრამპისა და ორბანის შეხვედრის ფონზე აცხადებს, რომ უკრაინა რუსეთს ნავთობის ევროპაში გაყიდვის უფლებას არ მისცემს და უნგრეთის პრემიერი უკრაინის ევროკავშირში გაწევრიანებას ხელს ვერ შეუშლის
უკრაინის პრეზიდენტმა ვოლოდიმირ ზელენსკიმ აშშ-ის პრეზიდენტ დონალდ ტრამპსა და უნგრეთის პრემიერ-მინისტრ ვიქტორ ორბანს შორის დღეს დაგეგმილი შეხვედრის ფონზე განაცხადა, რომ უკრაინა რუსეთს ნავთობის ევროპაში გაყიდვის უფლებას არ მისცემს.
როგორც ზელენსკიმ ბრიფინგზე აღნიშნა, ორბანი ვაშინგტონში ჩავიდა, რათა მაქსიმალურად წამოსწიოს საკითხი იმის შესახებ, რომ „ რუსეთის ფედერაციაზე [უნგრეთის] ნავთობდამოკიდებულება არ დაზარალდეს“.
„მაგრამ მან დაუყოვნებლივ უნდა გაიგოს ჩვენი პოზიცია ამ საკითხთან დაკავშირებით. ჩვენ არ შეგვიძლია, „რუსებს“ ამით - ენერგეტიკიდან - მოგების მიღების შესაძლებლობა მივცეთ. და მაშინაც კი, როდესაც ისინი ხელებს გვიკრავენ გარკვეული კონტრაქტების, ვალდებულებების და ა.შ. გამო - ჩვენ მაინც ვიპოვით გზას იმის უზრუნველსაყოფად, რომ რუსული ნავთობი ევროპაში არ მოხვდეს“, - ხაზგასმით აღნიშნა ზელენსკიმ.
როგორც სახელმწიფოს მეთაურმა განაცხადა, ძალიან კარგია, რომ შეერთებული შტატები ამით დაინტერესებულია.
„მაგრამ ჩვენ, როგორც რუსული აგრესიის ქვეშ მყოფი ქვეყანა, ამით ნამდვილად დაინტერესებულები ვართ. და ორბანმა, რომელიც მუდმივად განიხილავს საკითხებს სხვადასხვა მნიშვნელოვან მოთამაშესთან, რათა მათ ჩვენზე გავლენა მოახდინონ, ჩემი აზრით, საარჩევნო კამპანია არა უკრაინის მიმართ სიძულვილზე, არამედ მეგობრობაზე უნდა ააგოს. საქმე ისაა, რომ შეხედეთ: მე მაქვს პრობლემა, მოდით, დამეხმარეთ მის მოგვარებაში ენერგეტიკის თვალსაზრისით. ის არ ფიქრობს ადამიანებზე, ამ პრობლემის გადაჭრაზე, არამედ საკუთარ თავზე. და ფიქრობს, რომ ამას უკრაინის მიმართ სიძულვილის გამო გააკეთებს. ის ამას არ გააკეთებს. რატომ? - იმიტომ, რომ ჩვენ არ მივცემთ მათ ამის უფლებას. ჩვენ არ მივცემთ „რუსებს“ იქ ნავთობის გაყიდვის უფლებას“, - განაცხადა ზელენსკიმ.
როგორც პრეზიდენტმა დასძინა, ეს დროისა და პოზიციების საკითხია.
„არის ზოგიერთი რამ, რისი გაკეთებაც დღეს უბრალოდ არ შეგვიძლია. რადგან ამ თავსატეხში ბევრი განსხვავებული დამოკიდებულებაა. მაგრამ ჩვენ მაინც შევაერთებთ ნაწილებს. და ის ამას ნათლად ხვდება. და ვერავინ შეძლებს ჩვენზე გავლენის მოხდენას. უბრალოდ ვერავინ“, - აღნიშნა ზელენსკიმ.
უკრაინის პრეზიდენტმა ასევე ხაზგასმით აღნიშნა, რომ უკრაინის ევროკავშირში გაწევრიანებისკენ პროგრესს ვერავინ შეაჩერებს.
„უკრაინის განვითარებას, მის გზას ევროპისკენ ვერავინ შეაჩერებს. „რუსები“ ამას ვერ შეძლებდნენ. ის ფიქრობს, რომ ექვსი თვის შემდეგ, ან სხვა დროს ეს უკრაინას შეაჩერებს - არა!“, - დარწმუნებულია ზელენსკი.
მან ასევე აღნიშნა, რომ უკრაინა უნგრელი ხალხის წინააღმდეგ არაფერს აკეთებს და უნგრელების მადლიერია.
უკრაინის პრეზიდენტმა დასძინა, რომ ორბანი ვერ შეძლებს უკრაინის ღირსებისა და თავისუფლების დაბლოკვას. „ის დროს კარგავს“, - აღნიშნა ზელენსკიმ.
