უკრაინის პრეზიდენტმა ვოლოდიმირ ზელენსკიმ განაცხადა, რომ საფრანგეთის სამხედროები ერთ-ერთი პირველი იქნებიან უცხოური ჯარების კონტინგენტში, რომელთა განლაგებაც უკრაინაში ომის შეწყვეტის შემთხვევაში იგეგმება. ამის შესახებ საახელმწიფოს მეთაურმა ბრიფინგზე განაცხადა, იუწყება UNIAN.

ზელენსკის თქმით, უკრაინაში ევროპული სამშვიდობოების გაგზავნის იდეას დღეს სწორედ საფრანგეთი და დიდი ბრიტანეთი წარმოადგენენ და აღნიშნა, რომ დეტალებს სამხედრო მოსამსახურეების რაოდენობასა და ვადებზე ჯერჯერობით ვერ იტყვის.

მისივე თქმით, დიდი ბრიტანეთისა და საფრანგეთის სამხედრო დელეგაციების კიევში ვიზიტამდე სერიოზული მუშაობა ჩატარდა, რომელშიც მონაწილეობდნენ უკრაინის შეიარაღებული ძალების მთავარსარდალი ალექსანდრე სირსკი, პრეზიდენტის აპარატის უფროსის მოადგილე პავლო პალისა, გენერალური შტაბის უფროსი ანდრეი გნატოვი და გენერალი ევგენი მოისიუკი.

„ისინი საკმაოდ დიდი ხნის განმავლობაში მუშაობდნენ. ეს არ არის პირველი შეხვედრა. მაგრამ, მეჩვენება, რომ ასეთი ფუნდამენტური შეხვედრა ერთ-ერთი პირველია. დღეს ჩვენ ამაზე უკვე ორი თვეა, ვმუშაობთ“, - განაცხადა ზელენსკიმ.

პრეზიდენტის თქმით, შეხვედრაზე სამშვიდობოების განლაგების თარიღები განიხილეს, ვინაიდან ძალიან მნიშვნელოვანია იმის გაგება, შეთანხმებების რა ეტაპზე შეიძლება ქვეყანას მათი იმედი ჰქონდეს.

ამასთან, მან აღნიშნა, რომ ამ პროცესში ჩართული იყო არა მხოლოდ პარიზი და ლონდონი, არამედ მრავალი სხვა ქვეყანა. განიხილება პარტნიორების ყოფნა ხმელეთზე, ზღვასა და ცაში, ასევე, საჰაერო თავდაცვა და „ზოგიერთი დელიკატური რამ“:

„ეს იქნება კოალიცია. ვფიქრობ, ჯერ კიდევ გვჭირდება დაახლოებით ერთი თვე. ვფიქრობთ, რომ მეტი დრო აღარ იქნება საჭირო და ჩვენ სრულად გავიგებთ ამ ინფრასტრუქტურას“.

ზელენსკის ცნობითვე, ამიერიდან მუშაობა პერმანენტულ ფორმატში გაგრძელდება - დაგეგმილია ყოველკვირეული შეხვედრები სამხედრო დონეზე.