მოლაპარაკებების დროს უკრაინისთვის პრიორიტეტი ძლიერი არმიაა. ამის შესახებ უკრაინის პრეზიდენტმა ვოლოდიმირ ზელენსკიმ ჩერნიგოვის ოლქის ტერიტორიული თემების ლიდერებთან შეხვედრისას განაცხადა. 

„ეს არის „წითელი ხაზი“ - არანაირი შემცირება ჩვენი არმიის შემადგენლობაში. მართალი გითხრათ, ყველაფერს გავაკეთებთ იმისთვის, რომ ჯარი რაოდენობრივად იმავე მდგომარეობაში დარჩეს, როგორშიც დღეს არის. დიდი არმია, რომელიც სამჯერ უფრო დიდია, ვიდრე ომის დასაწყისში იყო. არმია, რომელსაც მხოლოდ მოდერნიზაცია შეუძლია. ეს არის ცვლილებები, რაც ომის დასრულების შემდეგ შეიძლება მოხდეს“, - აღნიშნა ზელენსკიმ.

მან ასევე დასძინა, რომ კიდევ ერთი „წითელი ხაზი“ არის ოკუპირებული ტერიტორიების რუსულად აღიარება.

„ყოველ შემთხვევაში, ეს დროებით ოკუპირებული ტერიტორიებია. სამართლიანი მშვიდობა იქნება, როცა ყველა ტერიტორია დაბრუნდება. მაგრამ თუ შესაძლებელი იქნება კომპრომისის მოძებნა, რომ ამ ტერიტორიების დაბრუნება დროთა განმავლობაში დიპლომატიური გზით მოხდეს - ვფიქრობ, ალბათ, რაც შეეხება ზოგიერთ ტერიტორიას, ეს იქნება ერთადერთი გზა. იმიტომ, რომ ომი ასე დიდხანს ვერ გაგრძელდება. ამიტომ, ჩვენ ყველაფერს გავაკეთებთ იმისთვის, რომ უკრაინის ტერიტორიული მთლიანობის აღდგენა მოხდეს ჩვენთვის, ეს მნიშვნელოვანი საკითხებია“, - დასძინა ზელენსკიმ.

გარდა ამისა, ზელენსკის თქმით, მოლაპარაკებებთან დაკავშირებით  უკრაინის კიდევ ერთი მთავარი საკითხი უსაფრთხოების გარანტიებია.

„ჯერჯერობით ნატოსთან საქმე გართულებულია, მაგრამ მაინც, არავინ ხსნის ამ საკითხს მაგიდიდან. ყოველ შემთხვევაში, ჩვენ ვამბობთ, რომ თუ ვინმეს ახლაც არ სურს ამის მხარდაჭერა, ვნახოთ, რა იქნება მომავალში. მაგრამ მნიშვნელოვანია, რომ ჩვენ გვქონდეს შესაბამისი გარანტიები, ნატოს მსგავსი, სანამ კავშირში არ ვართ. ეს ეხება ჩვენი პარტნიორების კონტინგენტსა და ძალისხმევას, რომელსაც შეგვიძლია ვენდოთ“, - აღნიშნა ზელენსკიმ.