უკრაინის პრეზიდენტმა ვოლოდიმირ ზელენსკიმ განაცხადა, რომ ომის დასრულებისთვის მოლაპარაკებების ფარგლებში შემუშავებული ზოგიერთი დოკუმენტი იანვარში ხელმოსაწერად მზად იქნება. ამის შესახებ მან ჟურნალისტებს განუცხადა.

„ჩვენ ვთავაზობთ: მრჩევლები იანვარში შეხვდნენ ერთმანეთს, ლიდერებიც იანვარში შეხვდნენ. ჩვენ ვფიქრობთ, რომ არსებობს შესაძლებლობა, ევროპის, აშშ-ისა და უკრაინის ლიდერები იანვარში შეხვდნენ ერთმანეთს. არსებობს დოკუმენტები, რომლებიც ხელმოსაწერად იანვარში აუცილებლად მზად იქნება“, - განაცხადა სახელმწიფოს მეთაურმა, თუმცა არ დააკონკრეტა, რომელ დოკუმენტებს გულისხმობდა.

მან დასძინა, რომ ყველაფერი „მხარეების შესაძლებლობებსა და სურვილზეა დამოკიდებული, რომ ხელი მოაწერონ“.

ზელენსკიმ ხაზგასმით აღნიშნა, რომ მან აშშ-ის პრეზიდენტ დონალდ ტრამპსა და ევროპელ ლიდერებს გადასცა, რომ „პუტინთან შეხვედრის ნებისმიერი ფორმატისთვის“ მზად არის.

„მე არ მეშინია ჩვენი შეხვედრის არცერთი ფორმატის. მთავარია, რომ „რუსებს“ არ ეშინოდეთ“, - აღნიშნა სახელმწიფოს მეთაურმა.